מיט צער און טרויער האבן פילע אידן באגלייט למנוחות הגאון הגדול רבי אברהם נתנאל צוקער זצ"ל ראש ישיבת אור ישראל אין פלעטבוש, וועלכער איז דעם שבת נפטר געווארן לחיי העולם הבא, אין בליענדן עלטער פון ניין און פופציג יאר, נאכן ווערן שווער פארוואונדעט אין א עקסידענט מיט עטליכע וואכן צוריק.
הגאון ר' אברהם נתנאל האט געדינט פאר לאנגע יארן אלס ראש ישיבה און רב פון קהל אור ישראל אין פלעטבוש, ער איז געווען א תלמיד פון ישיבת רבינו חיים בערלין, און א נאנטער מקורב ביים ראש ישיבה הגאון הגדול רבי אהרן שעכטער זצ"ל. מיט ארום דרייסיג יאר צוריק האט ער אויפגעשטעלט די ישיבה אור ישראל אין פלעטבוש, וואו ער האט אוועקגעשטעלט טויזענטער תלמידים נאמנים, וועלכע האבן זיך נאך די חתונה ווידער פאראייניגט תחת מרותו און אוועקגעשטעלט די קהילה אור ישראל אין פלעטבוש.
די לוויה איז פארגעקומען נעכטן זונטאג בהיכל ישיבתו אור ישראל אויף נאסטרענד עוועניו, און היינט מיטאג איז פארגעקומען די לוויה בהיכל ישיבת פחד יצחק אין די הר נוף געגנט אין ירושלים, אויפן וועג צום הר המנוחות וואו ער איז געקומען לקבורה.
