הרחבת גבולי הקדושה ווערט גראטולירט אינערהאלב מוסדות אלכסנדר אין בארא פארק, ווען אין די יעצטיגע טעג איז די הנהלת התלמוד תורה אריינגעשפרינגען אין א מאסיווע פראיעקט אפצוקויפן א גרויסע שטח אויף די צוויי און זעכציגסטע סטריט אין בארא פארק פארן געברויך פון די חדר.
די תלמוד תורה איז געגרינדעט געווארן מיט בלויז עלף יאר צוריק און איז בליעה"ר אויסגעשטיגן אלס א גאר געלונגענע חדר מיט גרויס הצלחה. עס איז שוין פארהאן פאראלעל קלאסן און יעדעס יאר שטייגט די צאל תלמידים אויף א דראסטישע פארנעם, געבנדיג דעם מוז אונטערצונעמען א פראיעקט און אויפבויען א אייגענע בנין לצרכי המוסדות.
די נייע שטח וואס געפונט זיך אויף די צוויי און זעכציגסטע סטריט צווישן די זעכצנטע און זיבעצנטע עוועניוס, אויפן זעלבן בלאק פון די צוויי גרויסע אלכסנדר מתיבתות, פארמאגט דערווייל א געביידע פון זעכצן טויזנט סקווער פיס, לויטן פלאן וועט מען עס אראפווארפן און דארט אויפבויען אויפן פלאץ א גיגאנטישע געביידע פון פופציג טויזענט סקווער פיס, קלאס צימערן און עטליכע זאלן מיט נאך פילע באדערפענישן.
