היסטארישע מאורע געפלאנט בחצרות הקודש וויזניץ בראשות האחים האדמורי"ם, אין די גיגאנטישע ברוקלין סטאורהאוז געביידע
אלפי חסידי וויזניץ זקנים עם נערים גרייטן זיך מיטצולעבן א זעלטן היסטארישע מעמד, א כנסיה אדירה לשם שמים וואס וועט צונויפברענגען טויזענטער חסידים פון נאנט און ווייט, ובראשם כ"ק מרנן ורבנן האחים האדמורי"ם שליט"א לבית וויזניץ, וואס וועט פארקומען בעוד כמה שבועות, דעם קומענדיגן דאנערשטאג פרשת ויחי, אור ליום עשרה בטבת הבא עלינו לטובה.
די היסטארישע חגיגה ווערט אפגעהאלטן שטייענדיג כמעט זיבן יאר זינט די גרינדונג פון די סדר הלימוד "מאמר מרדכי" דחסידי וויזניץ, וואס איז נתייסד געווארן דורך אלע ברידער האדמורי"ם אינאיינעם, צוויי חדשים נאכן הסתלקות פונעם אומפארגעסליכן רעיא מהימנא הרה"ק בעל תורת מרדכי מוויזניץ זי"ע. אין לויף פון די יארן האט מען שוין מסיים געווען מערערע מסכתות וואס איז געלערנט געווארן דורך די טויזענטער חסידים, און אצינד גרייט מען זיך אנצוהייבן פון פריש מסכת ברכות און לערנען די מסכתות על סדר הש"ס, א בלאט א טאג כרצון קדשו פונעם וויזניצער רבי'ן זצ"ל, איין עמוד צו לערנען פונדאסניי, און איין עמוד איבערצוחזר'ן פון א טאג פריער.
צו דעם גרויסן געלעגנהייט ווען מען גרייט זיך צו מסיים זיין גאנץ סדר נזיקין, און אנהייבן פון פריש פון אנהייב ש"ס, איז באשטימט געווארן א ריזן מעמד וואס וועט צונויפברענגען אלע חסידים אינאיינעם, ועל צבאם די שרי התורה מנהיגי הקהילות, כ"ק מרנן האדמורי"ם לבית וויזניץ, וועלכע וועלן אלע צוגלייך קומען צו פארן ממקומות מושבותיהם און באשיינען דעם היסטארישן מעמד, וואס אנטשפרעכט צו פארשריבן ווערן מיט גאלדענע אותיות בקורות דברי הימים לבית וויזניץ.
ספעציעל ווערט אריינגעלייגט שטארקע כוחות דורך די עסקנים צו דראסטיש פארמערן די צאל לומדים, מיטן צושטעלן מער שיעורי תורה און חברותות, די עסקנים זיצן נאכט נאך נאכט צו פארזיכערן די מאקסימום סוקסעס און ארויפברענגען די קביעת עתים לתורה אויף פיל א שטערקערע פארנעם.
המקום אשר הכינותי
די גרויסע חגיגה וועט פארקומען דאנערשטאג פרשת ויחי, אין די גיגאנטישע זאל פון "ברוקלין סטאורהאוז" אין די נעיווי יארד קאמפלעקס אין ברוקלין, וואס איז ספעציעל ארויסגעדינגען געווארן דורך די טעטיגע עסקנים, וואס ארבעטן שוין לאנגע וואכן צו באטראכטן א פאסיג ארט וואו צו קענען אפרעכטן דעם מעמד.
די זאל געפונט זיך אין א סטראטעגיש ארט, ווייניגער ווי א שעה צו פארן פון אלע חרדישע צענטערן אין ניו יארק און ניו דזשערזי, וואו וויזניצע חסידים זענען פארשפרייט ובראשם מרנן האדמורי"ם. די זאל וואס נעמט אריין א ריזן שטח פון הונדערט טויזענט סקווער פיס איז נישט לאנג צוריק געעפנט געווארן פארן פאבליק, און די דאזיגע מעמד אדיר וועט זיין די ערשטע אידישע מאורע וואס קומט פאר דערין, און וועט ווערן נאכגעפאלגט דורך פילע גרויסע מעמדים פון גרעסערע קהילות איבער גרעיטער ניו יארק, וואס לייגן שוין א אויג אויף דעם פלאץ פאר די בעפארשטייענדע מעמדים גדולים.
אצינד גרייטן זיך די עסקנים אריינצוטרעטן אין די קומענדיגע פאזעס פון הכנות, אנצוגרייטן דעם ריזן זאל מיט טויזענטער זיץ פלעצער צו קענען אקאמאדירן די טויזענטער וויזניצע חסידים פון איבער די גאנצע וועלט, וואס גרייטן זיך צו זיין א טייל פון די היסטארישע כנסיה לשם שמים.
ספעציעל גרייט מען זיך צו אנפאנגען בהדרת כבוד פני קדשם פון די וויזניצע רביים פון אויסלאנד, כ"ק אדמו"ר מוויזניץ שליט"א פון לאנדאן, און כ"ק אדמו"ר מוויזניץ שליט"א פון בית שמש, וועלכע וועלן אונטערנעמען דעם לאנגן נסיעה צו באשיינען די היסטארישע חגיגה בבית וויזניץ, כ"ק אדמו"ר מוויזניץ שליט"א פון מאנטריאל וועלכער וועט קומען צו פארן פון קאנאדע, און אזוי אויך וועלן קומען צו פארן פילע חסידים מעבר לים און די ווייטערע שטעט צו אנטייל נעמען ביים היסטארישן מעמד, אין די צייט וואס פאר כלל חסידי וויזניץ בארץ הקודש ווערט געפלאנט א באזונדערע מעמד גדול זיך צו מיטפרייען בשמחת התורה.
