היינט איז באשטעטיגט געווארן אז כ"ק אדמו"ר מוויזניץ שליט"א פון קייאמישע וועט צום ערשטן מאל נאכן איבערנעמען די כתר האדמורו"ת, ארויספארן אויף א געהויבענע נסיעה קיין לאס אנדזשעלעס קאליפארניע, מיטן ציהל צו מתרים זיין די ארטיגע נגידים ושועים, און אויפטרייבן פינאנציעלע שטיצע לטובת די וויזניצע מוסדות המתנוססים לתפארה אין קרית וויזניץ קייאמישע לעיק.
דער וויזניצער רבי האט נאך קיינמאל נישט געפראוועט א שבת אין לאס אנדזשעלעס, טראץ וואס ער איז שוין געפארן אהין איינמאל אלס רב פאר א קורצע באזוך, מיט ארום צוואנציג יאר צוריק, אפנעמען די פאנטאסטישע נדבה פון הנגיד החסיד ר' שמעון מענלא ע"ה, בונה ומקים פונעם בנין בית המדרש הגדול אין קרית וויזניץ קייאמישע לעיק, אצינד ווערט צום ערשטן מאל געפלאנט א פולע געהויבענע נסיעה מיט א גייסטרייכע שבת, וואס וועט פון פריש אויפברענגען ידידי ומעריצי בית וויזניץ, און אוועקשטעלן א פעסטע יסוד פאר די מוסדות הקדושים אין גיבערס.
די נסיעה איז באשטימט אויף קומענדיגן פרשת משפטים, אין בלויז דריי וואכן ארום, דער רבי וועט ארויספארן פון ניו יארק מיטוואך פרשת משפטים, און פארבלייבן אין לאס אנדזשעלעס פאר א וואך צייט. דורכאויס די טעג וועלן פארקומען א רייע מסיבות און רייכע באנקעטן לטובת די מוסדות, אין די שטיבער פון די ארטיגע נגידים בעם תומכי תורה ומחזיקי תורה.
אין שפיץ פון די געהויבענע באזוך וועט זיין די גרויסארטיגע שבת וואס דער רבי וועט פראווענען אין לאס אנדזשעלעס אויף א ערשטמאליגע פארנעם, די תפילות און טישן וועלן פארקומען אין די ארטיגע חסידישע כולל יחיאל יהודה, מיט די באטייליגונג פון הונדערטער תושבי העיר, און אויסער דעם וועלן קומען צו פארן פילע חסידים פון ניו יארק און ארום, צו מיטהאלטן דעם געהויבענעם שבת כשהמלך בשדה.
