אין די ווירבלנדע בית המדרש זכרון משה אין ירושלים עיה"ק, איז אין די טעג אויפגענומען געווארן א נייער רב, נאכפאלגענדיג די פטירה פון הגאון הגדול רבי אהרן פישער זצ"ל רב אין בית המדרש, וועלכער איז נפטר געווארן די וואך אין עלטער פון אכט און זיבעציג יאר.
דער ביז יעצטיגער רב ר' אהרן זצ"ל, האט איבערגענומען די רבנות נאכן פטירה פון זיין גרויסן פאטער הגאון הגדול רבי ישראל יעקב פישער זצ"ל ראב"ד העדה החרדית. די וואך ביים מסע הלוויה פונעם רב בהיכל ביהמ"ד זכרון משה, האט מען אויסגערופן אז בנו חביבו הרה"ג ר' יהודה פישער שליט"א ווערט אויפגענומען אלס רב אין ביהמ"ד, נאך א קלארע הוראה פונעם פעטער הגאון הגדול רבי יהודה פישער שליט"א חבר ביד"ץ העדה החרדית, וועלכער האט קלארגעשטעלט די פסק הלכה אז א רב וואס לאזט איבער א זון וואס איז פאסיג איבערצונעמען, איז ראוי אז מען זאל אים אויפנעמען אלס רב.
דער נייער רב וואוינט אין די קרית צאנז געגנט אין ירושלים, און איז א איידעם ביי הרב החסיד ר' שמואל מינצבערג ז"ל, פון היינט אן וועט ער שטיין אין שפיץ פון איינער פון די מערסט באקאנטע בתי מדרשים איבער די וועלט, די ווירבלענדע זכרון משה שטיבלעך וואו עס קומען פאר מנינים יעדע פאר מינוט דורכאויס פיר און צוואנציג שעה א טאג.
