חסידי וויזניץ אין ניו יארק גרייטן זיך מיטצולעבן ימי שמחה וחדוה בחצר הקודש וויזניץ אין בארא פארק, ווען כ"ק אדמו"ר מוויזניץ שליט"א פון בארא פארק וועט פירן אונטער די חופה בתו הכלה החשובה שתחי', מיט די חתן א זון פון הגה"צ ר' אלימלך בער פיש שליט"א אב"ד תפארת מרדכי טשעסנאט רידזש, זון פון כ"ק אדמו"ר מביקסאד שליט"א, און איידעם ביי הגה"צ אבד"ק קראלי מאנסי שליט"א, חתן כלה אור אייניקלעך פון כ"ק אדמו"ר הרה"ק בעל תורת מרדכי מוויזניץ זי"ע, און פון כ"ק אדמו"ר הרה"ק רבי הערשעלע מספינקא זי"ע.
שטייענדיג אצינד א קארגע וואך אפגערוקט פון די גרויסע חתונה, ווערן שוין געמאכט פיבערהאפטיגע הכנות דורך די צענדליגע עסקני הקהילה, די חתונה וועט געפראוועט ווערן ברוב פאר והדר אין די פראכטפולע נייע "הייטנער" זאל, בבנין החדש פון תלמוד תורה באבוב אין בארא פארק. די זאל וועט ווערן אויסגעשטעלט צום מאקסימום צו קענען אקאמאדירן דעם גאנצן ציבור, און די שמחת החתונה פאר די נשים וועט פארקומען אין זאל פון אור החיים וויזניץ, אין די בנין הת"ת בנין ווילחאוויץ אויף די דריי און פופציגסטע סטריט.
א באזונדערע זאל ווערט צוגעשטעלט פאר די ילדי חמד, וואו עס וועט סערווירט ווערן פאר זיי די סעודת החתונה, און הויכשטאקיגע פארענטשעס ווערן אויפגעשטעלט אין די הייטנער זאל מיט גענוג פלאץ פאר די הונדערטער תלמידי הישיבות און אברכי הקהילה.
אין די יעצטיגע טעג האט דער געהויבענער מחותן כ"ק אדמו"ר מוויזניץ שליט"א אנגעהויבן ארומגיין לבתי אדמורי"ם ורבנים צו לאדענען צום שמחת החתונה, צווישן אנדערע האט שוין דער רבי באזוכט ביים שווער הגה"צ אבד"ק ראחמיסטריווקא מאנסי שליט"א, ביים פעטער כ"ק אדמו"ר מוויזניץ שליט"א פון מאנסי, ביי עטליכע אדמורי"ם ורבנים אין שטאט בארא פארק, האדמורי"ם מבאבוב 45, טשערנאביל, ראחמיסטריווקא, סקווירא מב"פ, ספינקא, בורשטין, און ראחמיסטריווקא פון וויליאמסבורג.
היינט מאנטאג איז דער רבי שליט"א ארויסגעפארן קיין מאנסי, צו פוקד זיין דעם ציון הק' פון זקינו הרה"ק מוויזניץ זי"ע, און אביו הרה"ק בעל אור שלום זצ"ל. אזוי אויך קומט דער רבי אן קיין שיכון סקווירא צו פוקד זיין דעם ציון הק' פון זקינו הרה"ק מסקווירא זי"ע, און דעם מיטוואך בעז"ה וועט דער רבי ארויספארן קיין ניו דזשערזי צו פוקד זיין דעם ציון הק' פון זקינו הרה"ק מספינקא זי"ע, וועלכער איז א זיידע סיי פון די חתן און סיי פון די כלה.
ספעציעלע זמני קבלת קהל איז געמאלדן געווארן ווען די חסידים וועלן האבן די געלעגנהייט אריינצוגיין אל הקודש פנימה, לברך ולהתברך לקראת די גרויסע שמחה. היינט מאנטאג אויפדערנאכט וועט דער רבי אויפנעמען דעם ציבור אין שטאט מאנסי, בבית האכסניא ביי הנגיד החסיד ר' מאיר זלמן שטעג שליט"א.
קומענדיגן שבת קודש וועט געפראוועט ווערן די שמחת האויפרוף בצל הקודש פונעם זיידן כ"ק אדמו"ר מביקסאד שליט"א אין וויליאמסבורג, מוצאי שבת וועט פארקומען די שמחת הפארשפיל, און אזוי אויך די שמחת החתן מאהל מאנטאג נאכט, אין ביהמ"ד הגדול וויזניץ אין בארא פארק. דעם דאנערשטאג ביים טיש לכבוד חמשה עשר בשבט, וועט פארקומען די סעודת עניים כנהוג.
מיטוואך משפטים ממחרת החתונה וועט פארקומען עטליכע שמחות שבע ברכות'ן דורך פארשידענע אפטיילונגען אין די מוסדות הקדושים, מיטאג צייט וועט פארקומען א שבע ברכות מיט די ילדי התלמוד תורה, א באזונדערע מעמד מיט די קלענערע קינדער אין חדר, און א באזונדערע מעמד מיט די תלמידים פון מכינה לישיבה. שפעטער ביינאכט וועט פארקומען א רייכע עלעגאנטע שבע ברכות צוגעשטעלט דורך די הנהלת המוסדות, געאייגענט ספעציעל פאר די צענדליגע מרביצי תורה פון אלע אפטיילונגען אין די מוסדות הקדושים.
דאנערשטאג נאכט וועט פארקומען די שמחת השבע ברכות בהיכל ישיבה גדולה בנין אבות וויזניץ אין קרית וויזניץ קייאמישע לעיק, וואו דער חתן האט געלערנט דורכאויס די ישיבה יארן. שבת שבע ברכות וועט געפראוועט ווערן אין ביהמ"ד הגדול וויזניץ אין בארא פארק, און מאנטאג נאכמיטאג די לעצטע שבע ברכות צוגעשטעלט דורך די הונדערטער תלמידי הישיבה, סיי פון ישיבה קטנה אמרי חיים, און סיי פון ישיבה גדולה תפארת מרדכי אין סטעטן איילענד, און וועט פארקומען אין זאל פון אור החיים וויזניץ אין בארא פארק.
