גייסטרייכער מעמד קביעת מזוזה און לחיים במעמד פון גדולי רבני העיר שליט"א צום חתונה שוי רום וועלכער אנטשפרעכט פרישע צייטן פאר מחותני העיר און וועט בעז"ה עלימינירן הימלשפאלטנדע חתונה הוצאות
מאנסי ניו יארק: א גייסטרייכער מעמד קביעת מזוזה במעמד פון גדולי הרבנים ועסקני העיר שליט"א איז אפגעהאלטן געווארן דעם פארלאפענעם דינסטאג ויקהל העעל"ט אין די הויפטקוואטירן פונעם 'הארמאני' חתונה שוי רום, וועלכער איז א טייל פון די 'מצא טוב' ארגאניזאציע, וועלכער פארנעמט זיך מיטן אויפקומען מיט אן ענדגילטיגער אפעקטיווער מהלך, צו שניידן די חתונה קאסטן פאר מחותני העיר, און פארזיכערן אז שמחות קענען ווידעראמאל אנגעהויבן געפראוועט ווערן מתוך אושר וכבוד, און מתוך שמחה.
מיט גרויס שפאנונג האבן מאנסיער איינוואוינער אויפגענומען די באריכטן אז א גרופע עסקנים האבן זיך צונויפגענומען מיטן ציל אראפצוברענגען די חתונה קאסטן איינמאל פאר אלעמאל, אויף אן אופן וואס עס זאל זיין מעגליך צו טוישן דעם אנגענומענעם הימלשפאלטנדער סטאנדארט, אבער נישט אויף א שטייגער וואס איז שוין פרובירט געווארן אינעם פארגאנגענהייט, נאר דווקא אויף א וועג וואס עס זאל זיך האלטן לדורות, און באמת אראפוועגן די הימלשרייענדע הוצאות.
מצא טוב ארבעט שוין אויף קעסל און כלים פאר א לענגערע צייט, אויפצוקומען מיט א לאנגטערמיניגער שטאנדהאפטיגער תכלית פלאן, וועלכער זאל האבן די מעגליכקייט צו ווערן א נחלת הכלל, און פארבלייבן אלס דער ענדגילטיגער לעזונג צו די הויכע הוצאות פון שמחות. מצא טוב האט שוין באוויזן צו שפארן רבבות אלפי דאלארן פאר מחותנים וועלכע זענען איינגעגאנגען צו נעמען דעם תכלית'דיגן מהלך, און חתונה מאכן מיט א חשבון וועלכער ערלויבט דעם מחותן צו אפאטעמען פריי, נישט דארפנדיג שווענדן קיין איבריג געלט אויף מינדערוויכטיגע זאכן, און גלייכצייטיג ווערט עס נישט דערקענט אויפן שמחה, ווען די חתונה ווערט געפראוועט אויפן זעלבן שיינעם אופן, און הערליכער סטאנדארט, נאר מיט מער מנוחת הנפש און הרחבת הדעת.
אלס טייל פונעם לאנגטערמיניגן פלאן דאס אויסצופירן, האט זיך די וואך געעפנט די טויערן פונעם 'הארמאני' חתונה שוי רום, וועלכער איז א פליגל פונעם מצא טוב ארגאניזאציע, אין וועלכן עס וועט ווערן צוגעשטעלט פאר מחותנים און פרישע פארפעלקער, הכל בכל מכל וואס עס פאדערט זיך צו קענען פראווען א חתונה, און אנהייבן בויען א אידישער שטוב, אבער פאר ביליגער ווי האלסעיל קאסטן. דער שוי רום גייט שוין אן א שיינער שטיק צייט אויף א קלענערע פארנעם, און אפפערט שטריימלעך, זילבער, מעבל, מתנות, און צירונגען, אלס פאר שטוינענד ביליגע פרייזן וועלכע קענען נישט פארמאסטן ווערן אין ערגעץ.
אצינד, ע"פ הוראת רבני העיר שליט"א, נעמט מצא טוב א ברייטן טריט פאראויס, און גרייט זיך אהערצושטעלן דעם לאנגטערמיניגן תכלית חתונה פלאן פאר אלע קהילות אין שטאט, און עפנט אויף די טויערן פונעם שוי רום פארן ברייטן ציבור. דער פראכטפולער שוי רום איז סטאנציאנירט אין די אטריום פלאזא אויפן רוט 59 אין מאנסי, און וועט שטיין גרייט צו סערווירן דעם היימישן עולם, און פארזיכערן אז כלל ישראל הייבט אן אפאטעמען פון דעם פינאנציעלן חתונה הוצאות לאסט. דער איניציאטיוו ווערט אונטערגעשטיצט דורך אלע רבני העיר שליט"א, און אויסגעפירט דורך די גדולי העסקנים וועלכע טוען פארזיכערן אז דער חתונה הוצאות פראבלעם זאל פארוואנדלט ווערן אין א חלק פונעם פארגאנגענהייט, מיטן אויבערשטנס הילף.
אין פאקט איז די נייע שוי רום א דירעקטע פארזעצונג צו די העכסט מוצלח'דיגע שוי רום וואס גייט שוין אן פאר א האלבע יאר, און איז ביז היינט געווען איינקוואטירט אין א קלענערע לאקאציע, אבער האט שוין פאקטיש געשפארט הונדערטער טויזענטער דאללארן פאר היימישע פארפעלקער אין מאנסי. אצינד מיט די מאסיווע פארברייטערונג וועט בעז"ה געשפארט ווערן פרישע מיליאנען פון היימישע מחותנים, וואס וועלן בעז"ה קענען אליינס חתונה מאכן מיט הרחבת הדעת.
די עקספיריענס וואס זעהט זיך אן זינט די שוי רום איז געעפנט געווארן, איז א שטוינענדער פאקט וואס קען נישט פארמעקט ווערן. עס קומען אריין כסדר כלות, מחותנים און מחותנות, מען קלויבט אויס הערליכע שטיק פאר שפאט ביליגע פרייזן, ממש פאר קאסט פרייז, און מען זעהט באשיינפערליך ווי אידישע געלטער ווערט געשפארט פון ווערן פארשווענדעט אן קיין חשבון.
די געטרייע עסקנים וואס טראגן דעם מאסיוון פראיעקט זענען דא מיט איין איינציג ציהל, אפצושלאגן די שרעקליכע מגיפה פון הויכע חתונה הוצאות און ארויסהעלפן מחותנים בעת שמחתם, קיינער זוכט נישט דא צו לייזן קיין גרויסע פארדינסטן, און אט דערפאר איז מעגליך צו פארקויפן די סחורה פאר שפאט ביליג אויף קאסט פרייז.
די וואס קומען אריין אין די שוי רום ווערן אנטפאנגען ממש קעניגליך, מען גיבט זיך אפ מיט יעדן איינעם מיט א שמייכל, און די רבנים און עסקנים באוואונדערן די קאלאספולע הצלחה וואס מען זעהט אויף טריט און שריט.
