א זעלטן התרגשות'דיגע מעמד איז פארגעקומען בביתו נאוה קודש פון מרן המשגיח הגאון הגדול רבי דן סגל שליט"א, דארט אינעם הייליגן ספרים שטוב בביתו נאוה קודש אין ירושלים, וואו דער גאון איז עוסק בתורה בהתמדה רבה און דביקות עילאה צום בורא כל עולמים.

עס זענען זיך צוזאמגעקומען א ענגע צאל נגידים ותומכים, די פילאנטראפן וואס שטייען אונטער די מאסיווע תורה אימפעריע "עטרת שלמה", אין שפיץ פונעם ראש הישיבה הגאון הגדול רבי שלום בער סורוצקין שליט"א, און מען האט אפגעראכטן א התרגשות'דיגע מעמד "מצות באקן" פאר די חשובע תומכים, אין שפיץ פונעם משגיח הגאון הגדול רבי דן סגל וועלכער האט אליינס עוסק געווען בעסק האפיה, און געבאקן די מצות וואס וועט פארטיילט ווערן פאר די לעגענדארע תומכים.

מען האט געזינגען ווארעמע ניגונים, און עטליכע קינדערלעך פון די מבצר התורה ת"ת עטרת שלמה האבן געזינגען דעם התרגשות'דיגן ניגון "טאטעלע קום שוין אהיים" וואס דער גאון המשגיח האט פארפאסט כידוע. באגלייט מיט ווארעמע און לעבעדיגע געזאנג האבן די חשובע בני הישיבה געבאקן די מצות, ווען דער משגיח זעלבסט גיסט די וואסער מיט גרויס התעוררות, באגלייט מיט הייסע תפילות און דמעות פאר די וואוילזיין פון די תלמידי הישיבה און די חשובע תומכים.

טראץ וואס די צייטווייליגע מצה בעקעריי איז געשטעלט געווארן אין א קליין צימערל בביתו נאוה קודש פונעם משגיח, איז עס אבער געווארן אהערגעשטעלט מיט די מאקסימום חומרות און הידורים ווען די מארגנים האבן אויסגעשטעלט יעדע דעטאל עס זאל שטימען לפי דקדוק ההלכות.