שטייענדיג קארגע צען טאג בעפאר די פרייליכע יו"ט ל"ג בעומר, זענען די פיבערהאפטיגע הכנות אין אתרא קדישא מירון אריין היינט אין א פרישע פאזע, ווען עס האט זיך אנגעהויבן די אלגעמיינע רעגיסטראציע און שווערע טויזענטער אידן זענען פארנומען זיך איינצוהאנדלען א טיקעט, צו קענען וויילן אין מירון אין דעם גרויסן טאג.
די טיקעט צענטער האט זיך געעפנט נעכטן אכט אזייגער אווענט ארטיגע זייגער, און עס ווערט פארקויפט טיקעטס צו קענען זיין אין מירון פאר פינף שעה. היי יאר ווען ל"ג בעומר געפאלט ערב שבת קודש, וועלן מערערע גרויסע הדלקות פארקומען בליל ל"ג בעומר דאנערשטאג נאכט, אנגעהויבן מיט די צענטראלע הדלקה דורך כ"ק אדמו"ר מבאיאן שליט"א בכניסת הלילה.
די גרעסטע הדלקה ווערט געפלאנט אויף דאנערשטאג אינמיטן נאכט, דורך הגה"צ המשפיע ר' אלימלך בידערמאן שליט"א. לויט די צוגרייטונגען רעכט מען זיך אויף צענדליגע טויזענטער משתתפים, און דעריבער האט מען דעזיגנירט די ריזן שטח נומער 89 וואס ווערט אויסגעשטעלט זייער ברייט מיט צענדליגע טויזענטער פלעצער. אנדערש ווי ביז היינט וועט נישט זיין פארענטשעס צו שטיין, נאר ספעציעלע סטאדיום זיצן ארום און ארום, צו מאכן די פארענטשעס פיל ווייטער ווי ביז היינט, צו אריינברענגען די מאקסימום ברייטקייט אינעם שטח ההדלקה, אז ווי מער מענטשן זאלן קענען מיטהאלטן.
