שטייענדיג געציילטע וואכן בעפאר די טייערע קינדערלעך די תינוקות של בית רבן פארן ארויס אין די קאנטרי בערג צו פארוויילן דורכאויס די זוממער סעזאן, זעהט זיך אן מאסיווע בוי ארבעט ביי די נייע יונגל קעמפ "מחנה זרע אברהם קראלי", ווען עס ווערט אויפגעבויעט א שפאגל נייע פראכטפולע געביידע לשם ולתפארת.
די יונגל קעמפ וואס דינט אלס ווארעמע אכסניא פאר הונדערטער קינדערלעך, תחת דגלו והדרכתו פון כ"ק אדמו"ר מקראלי שליט"א, גייט אצינד אריבער העפטיגע בוי ארבעט ווען מען שטעלט אויף א נייע גיגאנטישע געביידע צוצושטעלן אלע באדערפענישן פאר די ילדי המחנה. די בוי ארבעט רוקט זיך אין פולן שוואונג, און בעז"ה וועט עס שוין זיין גרייט צום אנהייב פון די זוממער סעזאן נאך יו"ט שבועות הבעל"ט.
די ריזן געביידע פארמאגט א הערליכע היכל בית המדרש, א פראכטפולע מקוה און א ריזן חדר אוכל, צען לופטיגע קלאס צימערן, און פיר און צוואנציג הערליכע שלאף צימערן מיט אלע באקוועמליכקייטן, אין צוגאב צו א באזונדערע עס זאל פאר משפחות וואס וויילן אין קעמפ דורכאויס די זוממער וואכן.
די נייע יונגל קעמפ וואס ווערט געבויעט לשם ולתפארת אין פאלסבורג אין ניו יארק, וועט טראגן דעם נאמען "מחנה זרע אברהם", באשטימט דורך כ"ק אדמו"ר מקראלי שליט"א, לזכר נשמתו הטהורה פון זיין גרויסן זיידן הרה"ק רבי אביש מקראלי זי"ע בעל זרע אברהם.
