פארלאפענע וואך איז פארגעקומען א פרייליכע חתונה אין ארץ ישראל בחצרות קרעטשניף י"ם - סטראפקוב - הארנסטייפל - זלאטשוב, דריי זיידעס האדמורי"ם האבן באשיינט די חתונה, אבער כ"ק אדמו"ר מסטראפקוב שליט"א האט זיך נישט געקענט באטייליגן זייענדיג געשטראנדעט אין די מרחקים צוליב די מצב המלחמה אין ארץ ישראל.
דער סטראפקובער רבי שליט"א איז ארויסגעפארן אויף א קורצע נסיעה קיין אייראפע נאך יו"ט שבועות, און האט געזאלט זיין צוריק אין ארץ ישראל אויף שבת פרשת בהעלותך צום שמחת האויפרוף. זייענדיג אונטערוועגנס קיין ארץ ישראל האט זיך די מלחמה מיט איראן אנגעהויבן, און דער רבי איז פארוואגלט געווארן קיין רוים אין איטאליע וואו דער רבי האט געוויילט איבער שבת.
מיט פארשידענע פראבעס אנצוקומען צוריק קיין ארץ ישראל בעפאר די חתונה, איז דער רבי געפארן קיין קפריסין, אבער מיט אלע שוועריגקייטן איז דער רבי הערשט אנגעקומען קיין ארץ ישראל א טאג נאך די חתונה.
דאנערשטאג נאכט האט דער רבי אפגעראכטן א שבע ברכות לכבוד די שמחה בבית מדרשו, און זיך דאן מיטגעפריידט פונדערנאנט מיט גרויס שמחה. דער רבי האט געטאנצן מצוה טאנץ לפני הכלה, און איז אויך געפארן אויף שבת קיין ביתר צו באשיינען די שבת שבע ברכות.
