שטייענדיג צוועלף טעג נאך וואס עס האט זיך אנגעהויבן די שרעקליכע מלחמה צווישן מדינת ישראל און איראן, וואס האט ליידער געקאסט דאס לעבן פון אכט און צוואנציג אידן, פארוואונדעט הונדערטער, און איבערגעלאזט דרייצן טויזענט איינוואוינער אן קיין דאך איבערן קאפ, איז ב"ה אריין אין קראפט א פייער אפשטעל צווישן די צוויי זייטן, אויסגעארבעט און פארלאנגט מיט שטאנדהאפטיגקייט דורכ'ן אמעריקאנעם פרעזידענט דאנאלד טראמפ.
גאר ווייטאגליך איז אבער די נייעס אז צום לעצטן שאס האט איראן ארויסגעשיקט א פרישע באראדזש פון מיסילס אין ריכטונג פון ארץ ישראל, בלויז א קורצע צייט בעפאר די פייער אפשטעל איז אריין אין קראפט, און עס האט ליידער געקאסט עטליכע קרבנות ה"י ווען א מיסיל האט געמאכט א דירעקטע אנפאל אויף א זיבן שטאקעדיגע באוואוינטע געביידע אין שטאט באר שבע.
די מיסיל האט באטראפן די געביידע צווישן די פיפטע און די זעקסטע שטאק, און האט צעווארפן א טייל פון די געביידע, ווען פילע איינוואוינער זענען פארכאפט אין די ברוכווארג. מאמענטאל ווערט באריכטעט אז פיר מענטשן זענען ליידער אומגעקומען ה"י, אריינגערעכנט איין סאלדאט אין די מדינת ישראל מיליטער אין עלטער פון אכצן יאר.
טראץ וואס די ערשטע באריכטן האבן געצייגט אז די אומגעקומענע זענען נישט געווען אין שעלטער, איז אבער שפעטער קלאר געווארן אז זיי זענען יא געווען אין שעלטער, און די דירעקטע אנפאל האט באטראפן די שעלטער וואו זיי האבן זיך געפונען. אזוי אויך זאגן באר שבע איינוואוינער אז נאכן באקומען א ווארענונג, האבן זיי נישט געהערט קיין פייף, שפעטער אבער האבן זיי נישט באקומען קיין ווארענונג נאר א פייף, און די איינוואוינער האבן נישט עספיעט אריינצולויפן אין שעלטער.
פרעזידענט טראמפ וועלכער האט איינגעשטעלט די פייער אפשטעל צווישן די צוויי מלחמה זייטן, האט עטליכע מאל דורכאויס די נאכט שארף געווארענט איינצוהאלטן די פייער אפשטעל, און פארלאנגט פון מדינת ישראל נישט אויסצופירן נקמה באמבאדירונגען אויף איראן, נאר שיינערהייט זיך צוריקדרייען און איינהאלטן די פייער אפשטעל אן קיין שום באמבאדירונגען.
אין רעזולטאט פון די פרישע מיסילס באראדזש איז פארשלאסן געווארן די לופטפעלד אין ארץ ישראל פאר אנדערטהאלבן שעה, ביז עס איז צוריק געעפנט געווארן פאר געצוימטע פליגערס אהיימצוברענגען געשטראנדעטע, אצינד ווען די פייער אפשטעל איז אריין אין קראפט איז די פלאן אז די לופטפעלד וועט זיך בקרוב עפענען מיט א פולשטענדיגע סקעדזשול פון צענדליגע פליגערס טעגליך.
