שטייענדיג קוים א יאר זינט די ישיבה איז געעפנט געווארן פאר די חשובע תלמידים, זעהט זיך אן די געוואלדיגע הצלחה און סייעתא דשמיא ווען מען איז מרחיב די גבולי הקדושה אויף א שטארקע פארנעם, סיי מיטן באנייען א אכסניא של תורה, און סיי מיטן טרעפן א זעלטן פאסיגע לאקאל וואו צו איינקוואטירן די ישיבה אויף א קביעות'דיגע פארנעם.
די ישיבה עמק החכמה וואס געפונט זיך אין מאנסי, ווערט געפירט דורך הגה"צ ר' מרדכי דוב בעק שליט"א אב"ד טאלמיטש וראש הישיבה, בן כ"ק אדמו"ר מטשערקאס שליט"א וחתנו חביבו פון כ"ק אדמו"ר מסקולען זצ"ל בעל ישועת יעקב, די ישיבה הק' איז נתייסד געווארן קוים א יאר צוריק, בחיזוק ועידוד פון הרה"ק מסקולען זצ"ל, וועלכער האט נאך בשארית כוחותיו פערזענליך איבערגעגעבן די הייליגע הוראות און הדרכות וויאזוי צו פירן די ישיבה און משפיע זיין אויף די חשובע תלמידים, און עטליכע מאל אויפגעטרעטן מיט שמועסן פאר די חשובע תלמידים.
דורכאויס די קורצע צייט זינט די ישיבה איז געעפנט געווארן, איז שוין פארשפרייט געווארן די כתר שם טוב פון די ישיבה אלס א מקום מוכשר לתורה ולתפילה, א פלאץ וואו בחורי חמד שטייגן בתורה ועבודה, אין די יארן נאך ישיבה גדולה ווען מ'גרייט זיך צום חתונה, אינאיינעם מיט חשובע תלמידי חכמים און משפיעים, תחת דגלו והדרכתו המיוחדת פון דער רב שליט"א ראש הישיבה, צו וועם די בחורים זענען מקושר בלב ונפש מיט א געוואלדיגע אהבה והערצה.
אין די זעלבע צייט האט מען אין א מזל'דיגע שעה געשלאסן מקח אויף א הערליכע גרויסע שטח רחבת ידים אין די היימישע בלומינגראוו געגנט אין קרית יואל, וואו די ישיבה וועט בעז"ה פלאצירט ווערן בקרוב הימים מיט גרויס הרחבת הדעת. א גרויסע שטח מיט בנינים, פופצן אקער לאנד גרויס מיט א אויגפארכאפנדע פאנאראמע אויפן גאנצן ארום, וואס פארמאגט אלע צוגעהערן פאר די ישיבה הקדושה.
