חסידי ומעריצי בית סקולען האבן זיך צוזאמגענומען פארגאנגענע וואך אין בית המדרש הגדול סקולען אין מאנסי, אוועקצושטעלן א פעסטן יסוד איתן פאר די מוסדות הקדושים "חסד לאברהם" המתנוסס לתפארה אין שטאט קדימה אין ארץ ישראל, און שטייט בנשיאות כ"ק אדמו"ר מסקולען שליט"א פון מאנסי.
ווי באקאנט זענען די הייליגע מוסדות "חסד לאברהם" צעטיילט געווארן אין די לעצטערע חדשים, ווען נאכ'ן הסתלקות פון כ"ק אדמו"ר בעל ישועת יעקב מסקולען זצ"ל, האט יעדער פון די ברידער און קינדער האדמורי"ם לבית סקולען באקומען בירושה איין מוסד אונטער זיין נשיאות, און ביים סקולענער רבי'ן פון מאנסי איז אויסגעפאלן בירושה דער הייליגער מוסד אין קדימה, וואו עס לערנען נאנט צו פופציג תלמידים וואס שטייגן טאג טעגליך בתורה ויראה.
די חשוב'ע תלמידים וועלכע קומען פון פרייע שטיבער, ווערן נתגדל אין דער ישיבה "חסד לאברהם" תחת דגלם והדרכתם פון חשוב'ע מחנכים ובראשם די חשובע ראש הישיבה הרב ליאור תשובה שליט"א, וועלכע גיבן זיך אפ מיט די תלמידים מיט א זעלטענער געטריישאפט, אונטער דער דירעקטער השפעה פונעם נשיא המוסדות כ"ק אדמו"ר מסקולען שליט"א פון מאנסי וואס עינו ולבו שם כל הימים. עס איז אקטיוו דארט אן ערנסטע קירוב אפעראציע ווען מען דערווארעמט די אידישע הערצער צום בורא עולם.
אצינד האט דער רבי שליט"א פערזענליך פאררופן א דרינגענדע אסיפה פאר קהל עדת חסידיו ומעריציו, מיט'ן ציל מיטצוטיילן מיט'ן ציבור חסידים מהנעשה והנשמע איבער דעם געוואלדיגן זכות וואס מען פארמאגט מיט'ן זכות שותפות אויף אזא הייליגן און מוצלח'דיגן מוסד, און דערביי אוועקשטעלן א פעסטן יסוד צו קענען פינאנצירן דעם הייליגן מוסד, נאך וואס דער רבי האט אוועקגעשטעלט א ספעציעלן וועד בעלי בתים און א באזונדערן אפיס אין אמעריקע פון וואו צו באגלייטן די געוואלדיגע הצלחה פון דעם מוסד.
דער מעמד איז פארגעקומען מיטוואך קרח ליל ראש חודש תמוז, ווען דער רבי איז ארויסגעקומען מיט א הייסן רוף צו די חסידים צו שטיין לימינו, ממשיך צו זיין די הייליגע פעולות נשגבות, ירושת הקודש פונעם גרויסן זיידן הרה"ק בעל נועם אליעזר מסקולען זי"ע, און דער גרויסער טאטע הרה"ק בעל מאור ישראל מסקולען זי"ע.
אלס יושב ראש המעמד האט אויפגעטראטן הרה"ג ר' נחמן זיגעלמאן שליט"א מנכבדי הקהילה און מנהל רוחני פון בית רחל דסאטמאר, וועלכער איז שוין יארן לאנג אריינגעטון בעובי הקורה אינערהאלב די מוסדות הקדושים חסד לאברהם. דער חשוב'ער יושב ראש האט געשילדערט די רייכע היסטאריע פון דעם מוסד, און די וויכטיגקייט פון פארזיכערן אז דעם רבינ'ס לעכטיגע ירושה איז ווייטער ממשיך בעוז ותעצומות.
דער משמש בקודש ביים רבי'ן הרב החסיד ר' אליעזר זוסיא גורעלניק הי"ו האט איבערגעגעבן א לעבעדיגן גריס מהנעשה והנשמע בין כותלי המוסדות, איבערגעבנדיג וואס עס טוט זיך דארט אין די יעצטיגע טעג, דער סדר היום פון די תלמידים, און די פיל פעולות מקרב צו זיין די אידישע נשמות לאביהם שבשמים.
דערנאך האט אויפגעטראטן הנגיד החסיד ר' יחיאל מיכל הכהן שווארץ הי"ו פון די חברי הוועד, וועלכער האט געברענגט לעבעדיגע עדות פון זיין חשוב'ן ברודער הנגיד החסיד ר' חיים יצחק שווארץ הי"ו, וועלכער איז נארוואס צוריקגעקומען פון א באזוך בין כותלי המוסדות, וואו ער האט צוגעזען פונדערנאנט די געוואלדיגע פעולות ווי אידישע קינדער ווערן פאקטיש געראטעוועט פון א פרייען לעבן צו א פרומען תורה'דיגן לעבן.
דערנאך האט מען געהאט די זכיה צו הערן דברות קודש פונעם רבי'ן, וועלכער האט בדרך אבותיו הקדושים געפלאקערט און געברענט, בעטנדיג הילף פונעם ציבור צו קענען ממשיך זיין די הייליגע פעולות.
דער רבי האט ערווענט אז אין דעם מוסד אליין זענען פארהאן צען בחורים מתלמידי המוסדות וועלכע זענען ארויסגעקומען פון מיליטער און געווארן גענצליך פרום א דאנק די הייליגע פעולות. דער רבי האט ארויסגעברענגט אז די איינציגע זאך וואס זיין טאטע דער רבי זצ"ל און דער זיידע דער בעל נועם אליעזר זצ"ל האבן באטיטלט אלס "ירושה", איז געווען איבער די מוסדות חסד לאברהם, וואס ברענגט ארויס די געוואלדיגע חשיבות עס צו באגלייטן ווייטער.
דערנאך איז דער גאנצער עולם אריבער ביים רבי'ן איבערגעבן פערזענליך די זכותי שותפות, צו זיין א טייל פון דעם הייליגן צוועק להצלת נשמות ישראל.
דער מעמד איז געקרוינט געווארן מיט א זעלטענער הצלחה, געבנדיג דעם שטופ צו קענען ממשיך זיין די הייליגע ירושה פון צדיקי בית סקולען זי"ע.
