צום פערטן מאל אין א רייע, האט זיך נעכטן אפגעשפילט היסטאריע אין די חרדישע ביזנעס וועלט אין אמעריקע, ווען שווערע טויזענטער אידן מיט די חסידישע טראגע האבן זיך צוזאמגענומען אויף ביזנעס אנגעלעגנהייטן, מקיים געווען דעם וחי אחיך עמך, און געשלאסן פרישע קאנטאקטן צו פארשטערקערן און פארבעסערן דעם האנדל וואנדל צווישן די חסידישע קארידארן.
די גרויסארטיגע "זה מזה" סאטמארע ביזנעס עקספא, איז אהערגעשטעלט געווארן אונטער די דירעקטע פירערשאפט פון הנהלת קהל יטב לב ד'סאטמאר, וואס האט שוין עטליכע יאר צוריק איינגעזעהן די וויכטיגקייט פון אהערשטעלן א חסידישע עקספא פארן היימישן ציבור צו פארשטערקערן די היימישע ביזנעסער, ביז היינט איז עס די גרעסטע חרדישע עקספא איבער די וועלט, און ציהט א מאסן צוזאמפאר פון נאנט און ווייט פון אלע שיכטן און קרייזן.
פון אלע שטעט לענגאויס ניו יארק און ניו דזשערזי, זענען טויזענטער סאטמארער ביזנעסלייט געקומען צו פארן, אהערגעשטעלט געניאלע און פאכמאנישע בודקעלעך וואו צו פארשטעלן די ביזנעסער, פון אלע סארט ביזנעסער וואס פארנעמט דעם אויבן אן ביים היימישן ציבור, צו אין קאנסטראקשען, צו אין עסן פירמעס, צו אין קאר ביזנעס, מארטגעדזשעס, אינשורענס, אלע סארט קליידונג, און נאך פילע סארט ביזנעסער וואס ברענגט צום אויבערפלאך די געוואלדיגע הצלחה פון סאטמארע ביזנעסלייט אין יעדע צייט.
רייכע לעקציעס זענען געגעבן געווארן איבער פארשידענע טעמעס, אינטערוויוס מיט סוקסעספולע ביזנעסלייט, און א ספעציעלע געלעגנהייט פאר באטייליגטע צו האבן א פופצן מינוטיגע פריוואטע מיטינג מיט אויסגערופענע ביזנעס קאנסאלטענטס און מבינים, ארויסצוהעלפן פרישע טריט אין די ביזנעס וועלט.
