א העלישע פייער האט אויסגעבראכן היינט ביינאכט אין ארץ ישראל, אין א רעדער פאבריק אויף רחוב תובל אין די רוממה געגנט אין ירושלים, וואו די גאנצע געביידע איז ארויף אין העלישע פלאמען צוליב די שעדליכע און שארפע כעמיקאלן וואס געפונט זיך דארט.
אין די צייט וואס צענדליגע פייערלעשער זענען אקטיוו אויפן סצענע צו איבערקומען די פלאמען און לעשן דאס פייער, האט מען שנעל ארויסגעכאפט די ספרי תורה און תשמישי קדושה פונעם דערנעבענדיגן טשערנאבילער בית המדרש, אויס מורא אז די שטארקע פייער וועט זיך פארשפרייטן אויף א שנעלע פארנעם. צוויי ארבעטערס פון די פאבריק זענען אפגעפירט געווארן אין שפיטאל נאכן אריינאטעמען רויעך.
