טויזענטער אידן האבן היינט באגלייט למנוחת עולמים, אחר מיטתו פון האי גאון וחסיד הרה"ג ר' שלום ישראל דירנפעלד זצ"ל מגדולי הרבנים בחצר הקודש בעלזא, וועלכער איז נפטר געווארן אין בליענדן עלטער פון אכט און זעכציג יאר, נאכן זיך מוטשענען מיט די ביטערע מחלה ה"י.
הגאון ר' שלום ישראל איז געווען א זון פון הגאון החסיד ר' יעקב אליעזר דירנפעלד זצ"ל ראש כולל בעלזא אין תל אביב, און איידעם ביי הרב החסיד ר' משה יעקב אופמאן ז"ל. אויפגעוואקסן איז ער אין די נאסטאלגישע בעלזא חדר בביתו נאוה קודש פון הרה"ק מבעלזא זי"ע אויף רחוב אחד העם אין תל אביב, און איז אלס בחור אריין לערנען אין די בעלזא ישיבה אין ירושלים.
מיט צענדליגע יארן צוריק באלד נאך די חתונה האט ער שוין אנגעהויבן מרביץ תורה זיין פאר תלמידים, ער איז געווען דער משגיח אין די בעלזא ישיבה אויף רחוב אגריפס, און מדריך געווען טויזענטער תלמידים לתורה וחסידות און יראת שמים. זיין קלארע דעת תורה און ישוב הדעת האט געהאלפן פילצאליגע אידן ברוחניות ובגשמיות, און אין די לעצטע צוואנציג יאר האט ער משמש געווען אלס ראש ישיבה אין תורה ואמונה, וואו ער האט צוריקברענגט אידישע קינדער למקור מחצבתם תחת כנפי השכינה.
דער גרויסער נפטר איז פאר לאנגע יארן געווען דער קביעות'דיגער בעל תפילה בחצר הקודש בעלזא, געדאווענט פארן עמוד אין די ימים הנוראים, און פארגעזינגען ניגונים ביי די טישן אין בעלזא הויף. דעם פרייטאג צונאכטס ביים טיש האט מען נאך מזכיר געווען זיין נאמען ביים שטעלן וויין בצל הקודש פון כ"ק אדמו"ר מבעלזא שליט"א, אבער ליידער נאך שבת איז אנגעקומען די שווערע בשורה אז הוא הלך למנוחות, ואלפי תלמידיו מכיריו ומעריציו עזב לאנחות.
די לוויה איז פארגעקומען היינט נאכמיטאג פארנט פון ביהמ"ד הגדול אין קרית בעלזא ירושלים, וואו כ"ק אדמו"ר מבעלזא שליט"א האט זיך באטייליגט בראש קהל חסידיו און מיטגעהאלטן די הספדים א שטיק צייט.
