ווי באריכטעט איז היינט מיטוואך נאכמיטאג פארגעקומען א היסטארישע כינוס גדולי ישראל אין ליכט פון די שרעקליכע גזירה פון גיוס בני הישיבות וואס הויערט אויף אחינו בני ישראל בארץ הקודש, די אסיפה איז פארגעקומען אין די פראכטפולע סקויה זאל אין מעלה החמישה, מיט די באטייליגונג פון צענדליגע אדמורי"ם רבנים וראשי ישיבות, גדולי התורה פון אלע שטעט איבער ארץ ישראל.
צווישן די העכער הונדערט גדולי הדור, האבן זיך אנגעזעהן כ"ק האדמורי"ם מגור, וויזניץ, צאנז, סערט וויזניץ, סלאנים, טשערנאביל, מאחנובקא בעלזא, ראחמיסטריווקא, ביאלא, קרעטשניף, דאראג, משכנות הרועים, בוהוש, דזיקוב וויזניץ, מודזיץ, שבט הלוי, תולדות יהודה סטוטשין, סקולען פון ירושלים, קאמארנא, טשארנאביל, נדבורנא ירושלים, ספינקא, זוטשקא, ביאלא ב"ב, נאראל, סטריקוב, טאלנא, קוזמיר, שומרי אמונים פון ב"ב, ירושלים, און אשדוד, מעליץ אשדוד, סאדיגורא ירושלים, חוג חתם סופר, אוזרוב, לעלוב פון ב"ב, לעלוב פון ירושלים, זוועהיל ירושלים, קרעטשניף קרית גת, ספינקא פון אמעריקע, סטריקוב ירושלים, טאלנא אשדוד, גארליץ, אשלג, קוידינוב, ספינקא ב"ב, זוטשקא אמסנא, ראדזין, אונגוואר, באסטאן, שידלובצא, בערעגסאז, ברעזאן, דעעש ירושלים, ביאלא פשיסחא אשדוד, באסטאן ביתר, דזיקוב, טרעבישאן, מיאלען, און לעלוב סאסנובצא.
הגה"צ ר' יעקב מאיר שעכטער שליט"א, הגאון הגדול רבי מאיר צבי בערגמאן שליט"א, הגה"צ המשפיע ר' צבי מאיר זילבערבערג, הגאון הגדול רבי יצחק זילבערשטיין שליט"א, הגאון הגדול רבי חיים פיינשטיין שליט"א, הגה"צ גאב"ד קרית צאנז ירושלים, גאב"ד בני ברק, גאב"ד מערב ב"ב, גאב"ד ביתר, גאב"ד קוממיות, גאב"ד רמת שלמה, גאב"ד צאנז שיכון ג', ראש ישיבת וויזניץ, ראש ישיבת זוועהיל, ראש ישיבת חיי משה, ראש ישיבת טשעבין, ראש ישיבת ערלוי, ראש ישיבת באיאן, ראש ישיבת סאדיגורא, ראש ישיבת קאוונא, ראש ישיבת פיטסבורג, אב"ד קהל עדת המתמידים, אב"ד מאקאווא אשדוד, אב"ד שבט הלוי בית שמש, בעל פסקי תשובות, הגה"צ המקובל ר' אביש צעהנווירטה, הגה"צ ר' יעקב יוסף טווערסקי בן כ"ק אדמו"ר מסקווירא, הגה"צ ר' אליעזר יצחק דאנציגער בן כ"ק אדמו"ר מאלכסנדר, און נאך.
צוערשט האט אויפגעטרעטן דער יושב ראש האסיפה הרה"ג ר' יצחק מאיר שטערנבוך שליט"א, און דערנאך האט הגה"צ המשפיע ר' אלימלך בידערמאן שליט"א פארגעזאגט פרקי תהלים לביטול רוע הגזירה. דורכאויס די אסיפה האבן אויפגעטרעטן א צאל גדולי הדור, כ"ק אדמו"ר מצאנז שליט"א, הגה"צ ר' יעקב מאיר שעכטער שליט"א, הגאון הגדול רבי מאיר צבי בערגמאן שליט"א, הגאון הגדול רבי יצחק זילבערשטיין שליט"א, הגה"צ ר' חיים שמערלער שליט"א אב"ד ביהמ"ד היכל צבי צאנז אין ירושלים, הגאון ר' חיים פיינשטיין שליט"א ראש ישיבת עטרת שלמה, הגאון רבי בנציון מוצפי שליט"א, הגאון ר' משה צדקה שליט"א ראש ישיבת פורת יוסף.
הגה"צ ר' משה ברזובסקי שליט"א ראש ישיבת סלונים האט פארגעליינט א מכתב קודש וואס כ"ק אדמו"ר מסלונים שליט"א האט אפגעשיקט צום גרויסן מעמד, זיך נישט קענענדיג באטייליגן פערזענליך מחמת חולשת גופו. הרה"ג ר' פנחס פריעדמאן שליט"א ראש הכוללים דבעלזא, האט פארגעליינט א מכתב קודש פון כ"ק אדמו"ר מבעלזא שליט"א, און אזוי אויך האט הרב יוקל ווייס שליט"א משב"ק כ"ק אדמו"ר מוויזניץ שליט"א פארגעליינט א מכתב קודש וואס דער וויזניצער רבי האט געשיקט צום מעמד ממעון הנופש אין שווייץ.
דער יושב ראש האסיפה הרה"ג ר' יצחק מאיר שטערנבוך שליט"א האט פארגעליינט א מכתב קודש פונעם פוסק הדור מרא דארעא קדישא הגאון הגדול רבי משה שטערנבוך שליט"א, וועלכער האט אויך געוואלט באשיינען די אסיפה אבער נישט געקענט צוליב חולשת גופו.
צום שלוס פון די אסיפה האט אויפגעטרעטן הגה"צ ר' יעקב מאיר שטערן שליט"א דומ"ץ וויזניץ, וועלכער האט פארגעליינט די החלטת האסיפה, קלארצושטעלן די פעלזן פעסטע שטעלונג פון אלע גדולי ישראל נישט נאכצולאזן פון די מסורה, און לוחם זיין בכל תוקף ועוז קעגן די אלע וואס ווילן אונטערברענגען די עולם התורה רח"ל. דערנאך האט הגה"צ ר' יעקב מאיר שעכטער שליט"א פארגעזאגט קבלת עול מלכות שמים, איידער די אדמורי"ם ורבנים האבן זיך געזעגנט לשלום.
