אינעם גרויסן בית המדרש דקהל יטב לב ד'סאטמאר אויף ראדני סטריט, בית מדרשו של רבי וואו די הייליגע סאטמארער רביים האבן אפגעראכטן די עבודת הקודש פאר לאנגע יארן, באותו מקום וואו כ"ק אדמו"ר מסאטמאר שליט"א פראוועט די עבודת הקודש מיט די באטייליגונג פון טויזענטער חסידים, ווערט אין די יעצטיגע טעג דורכגעפירט העפטיגע בוי ארבעט צו פארברייטערן די גבולי הקדושה.
די בית המדרש וועלכער דינט שוין דעם ציבור העכער א יובל יארן כולן שוין לטובה, איז שוין פון לאנג אויסגעוואקסן איר געברויך, ווען די ריזן ציבור חסידים קען שווערליך זיך אריינקוועטשן אין דעם אלטן בית המדרש, אבער צוליב די חביבות המקום זייענדיג דער מקום קדוש וואו הרה"ק מסאטמאר זי"ע האט נאך געפראוועט די עבודת הקודש האט מען קיינמאל נישט געוואלט מאכן קיין ערנסטע טוישונגען לרווחת הציבור.
אצינד איז אונטערגענומען געווארן א ספעציעלע בוי פראיעקט וואו מען הייבט אויף די דאך פון בית המדרש מיט נאך א שטאק, אויך די ווייבער שוהל וועט מען ארויפהייבן א שטאק העכער, וואס וועט צוברענגען נאך א גרויסע העכערע חלל אינעם היכל בית המדרש, וואס וועט שענקן די מעגליכקייט צו בויען גאלעריעס און הויכע פארענטשעס, צו קענען אקאמאדירן די טויזענטער חסידים אין די ימים הנוראים און ביי די גרעסערע מעמדים.
צוליב די העפטיגע בוי ארבעט וואס ווערט פארשטערקערט אין די יעצטיגע טעג, האט די הנהלת הקהילה געמאלדן אז היינט אויפדערנאכט וועט די היכל בית המדרש ווערן פארשלאסן פאר די קומענדיגע פאר וואכן, אזוי אויך די היכל התורה בבנין ביהמ"ד הגדול, אויסער די פאליש, די שטיבלעך אויפן ערשטן שטאק און די מקוה, וואס וועלן ווייטער בלייבן אפן לרווחת הציבור, ווען די שבת'דיגע תפילות וועט פארקומען אין די פאליש פון ביהמ"ד.
