די היינטיגע טאג האט ליידער נישט געברענגט קיין בעסערע נייעס אינעם מצב הבריאות פון כ"ק אדמו"ר מקרעטשניף סיגעט שליט"א לרפו"ש, וועלכער איז דעם פרייטאג צונאכטס צוזאמגעפאלן נאך א שווערע סטראוק רח"ל, וואס האט נאכגעפאלגט מיט א רייע ערנסטע געזונטהייט קאמפליקאציעס ה"י.
די דאקטוירים אין די שערי צדק שפיטאל האבן דורכגעפירט א רייע אונטערזוכונגען צו אבזערווירן דעם רבינ'ס מצב, און ווי עס שטעלט זיך ארויס האט דער רבי געליטן גאר ערנסטע און פערמינאנטע שאדן, וואס נאר דער רבונו של עולם קען צוריקדרייען כי בידו הכל, דער רבי געפונט זיך אין א קריטישע צושטאנד און איז אנגעוואנדן אויף תפילות ישראל.
בהוראת הקודש פון די גדולי הדור, ובראשם הגה"צ רבי יעקב מאיר שעכטער שליט"א, האט מען צוגעלייגט דעם נאמען "ברוך" אלס א סגולה פאר רפואה, דער רבונו של עולם זאל זיך מרחם זיין און דער רבי זאל ארויסגיין פון דעם שרעקליכן מצב סכנה. אין די זעלבע צייט זענען דעם רבינ'ס קינדער פון אמעריקע ארויסגעפארן אויפן וועג קיין ארץ ישראל, צו זיין נעבן דעם רבי'ן אין דעם שווערן מצב.
דעם שבת נאך וואס מען האט דערציילט די שווערע אנטוויקלונגען פארן רבינ'ס ברודער כ"ק אדמו"ר מקרעטשניף שליט"א פון ירושלים, האט דער רבי געהייסן מאכן א מי שברך לרפואתו ביי קריאת התורה.
יעצט זונטאג פארנאכטס אין ארץ ישראל האבן פילע אידן זיך צוזאמגענומען אין ביהמ"ד קרעטשניף סיגעט אין ירושלים, וואו מען זאגט אויס גאנץ ספר תהלים און מען טוט איינרייסן ביים בורא כל עולמים, אז כ"ק מרן ברוך זיידא אליעזר זאב בן שפרה זאל האבן א גענצליכע רפואה, און ארויסקומען פון דעם מצב סכנה ווי אמשנעלסטן. והן קל כביר לא ימאס תפילת הרבים.
