כלל ישראל בכל מקומות מושבותיהם זענען איינגעהילט אין שאק און שוידער, נאך די שרעקליכע שיסעריי טעראר אטאקע וואס האט זיך אפגעשפילט היינט פארמיטאג אין די רמות געגנט אין ירושלים עיה"ק, ווען צוויי קאלטבלוטיגע טעראריסטן זענען ארויפגעקומען אויף א באס און געשאסן אויף פילע פאסאדזשירן, אומברענגענדיג זעקס אידישע קרבנות השם ינקום דמם.
די טעראר אטאקע האט פאסירט ביי א באס סטאנציע אין די רמות געגנט, ווען די צוויי טעראריסטן זענען ארויסגעקומען פון א קאר, ארויף אויפן באס און זיך גענומען שיסן אויף די אנוועזנדע פאסאדזשירן, זעקס אידן זענען ליידער ערמארדעט געווארן קאלטבלוטיג, אין די צייט וואס נאך צוועלף זענען פארוואונדעט געווארן, און געפונען זיך אצינד אין שפיטאל פאר באהאנדלונגען.
א באוואפנטער ציווילער און א מדינת ישראל סאלדאט וואס איז געווען אין די אומגעגנט, האבן באלד רעאגירט צו די סצענע און געשאסן די צוויי טעראריסטן צום טויט, שפעטער איז קלאר געווארן אז זיי האבן אריינגעדרינגען פון די מערב ברעג און באוויזן צו דורכפירן די טעראר אטאקע, אין שטיצע פון די מוזשיהאדין טעראר גרופע, וועלכע איז אויך פאראנטווארטליכט אויף די פארכאפונג און מארד פון די באקאנטע ביבאס פאמיליע. אזוי אויך האט די כאמאס טעראר גרופע ארויסגעשטעלט א סטעיטמענט צו אויסלויבן די טעראריסטן פאר זייער אקט.
די זעקס קרבנות זענען נישט לאנג דערויף אידענטיפיצירט געווארן, אין צוגאב צו א באקאנטער ראש ישיבה וועלכער איז שווער פארוואונדעט געווארן אין די אטאקע, הרה"ג ר' יעקב שארבאני שליט"א מראשי ישיבת מאור התורה, וועלכער איז געווען אונטערוועגנס פון זיין שטוב צו די ישיבה, און איז פארוואונדעט געווארן פון א קויל פון זיין רוקן. ער געפונט זיך אין די שערי צדק שפיטאל פאר באהאנדלונגען, און אידישע קינדער זענען מתפלל לרפואתו, הגאון רבי יעקב חיים בן תמר איבון בתוך שאר חולי ישראל.
די נעמען פון די קדושים זענען ווי פאלגענד: הרב אלטר ישראל מענצער הי"ד איין און דרייסיג יאר אלט, די לוויה וועט פארקומען היינט נאכט אויף רחוב רבן גמליאל אין בני ברק. ר' יוסף דוד הי"ד דריי און פערציג יאר אלט, די לוויה וועט פארקומען ביי בית הכנסת משכן שרגא אין רמות. ר' יעקב פינטו הי"ד פינף און צוואנציג יאר אלט, די לוויה וועט פארקומען ביי ישיבת דרך אמונה אין לוד. ר' לוי יצחק פיש הי"ד זיבן און פופציג יאר אלט, וועלכער האט געארבעט אין ישיבת קול תורה, די לוויה קומט פאר יעצט נאכמיטאג ביי ישיבת קול תורה אין די בית וגן געגנט אין ירושלים. דאקטער ר' מרדכי שטיינציג הי"ד ניין און זיבעציג יאר אלט פון בית שמש, און מרת שרה מענדלזון הי"ד פון רמת שלמה, זעכציג יאר אלט.
יהי רצון שלא ישמע עוד שוד ושבר בגבולינו, ושנשמע ונתבשר בשורות טובות.
