אין די גרויסע בית המדרש דחסידי סלונים אין די מאה שערים געגנט אין ירושלים, איז דעם דינסטאג געפראוועט געווארן די פרייליכע שמחת החתונה פון חתן כלה אייניקלעך ביי כ"ק אדמו"ר מסלונים שליט"א, די חתן א זון פונעם רבינ'ס איידעם הגה"צ ר' גדלי' ריזל שליט"א רב חסידי סלונים אין קרית גת, מיט די כלה א טאכטער פונעם רבינ'ס איידעם הגה"צ ר' אורי ווייסבלום שליט"א ר"ם בישיבת סלונים אין ביתר.
ווי יעדע חתונה אין הויף האבן זיך באטייליגט טויזענטער חסידים, אבער מיטן בליה און וואוקס פונעם ציבור האט זיך אנגעזעהן א גרעסערע ציבור ווי ביז היינט, און דעריבער האבן די גבאי בית המדרש נישט געזעהן קיין אפציע צו פריי מאכן א ווינקל אין ביהמ"ד פאר די נשים, וואס קומען אריין צום מצוה טאנץ כנהוג בחצרות הקודש.
אין אן ערשטמאליגן שריט האט מען מיטן רבינ'ס הסכמה געלאזט דעם סדר אין ביהמ"ד פון די גאנצע חתונה אויך ביים מצוה טאנץ, און די נשים זענען פארבליבן אין די ווייבער שוהל אויפן העכערן שטאק פון בית המדרש. ווען דער רבי שליט"א איז צוגעטרעטן צום מצוה טאנץ האט מען צוגעברענגט א גאר לאנגע ווייסע גארטל, וואס האט פארבינדן דעם רבי'ן אינעם היכל בית המדרש, צו נכדתו הכלה וואס האט זיך געפונען א שטאק העכער אין די ווייבער שוהל, און אזוי האט דער רבי געטאנצן בעוז ותעצומות כדרכו בקודש.
