פאר יארן לאנג פלעגט כ"ק אדמו"ר מסקווירא שליט"א יעדעס יאר גיין אויף א באזוך אין תלמוד תורה, און מחזק זיין די תינוקות של בית רבן, זייענדיג משפיע אויף זיי פונדערנאנט. די לעצטע פאר יאר איז דאס שוין נישט צושטאנד געקומען, ווען דער רבי שליט"א איז שוין אויף די עלטערע יארן בליעה"ר, אין צוגאב צו די גאר פארנומענע סדר היום מיטן ריבוי הציבור, דורכאויס די גאנצע יאר.
אצינד איז געווארן איינגעפירט אינערהאלב די סקווירא הויף, אז די ילדי התלמוד תורה קומען צום רבי'ן אויף א באזוך, דאווענען שחרית מיטן רבינ'ס מנין און נהנה זיין מזיו אורו אויף א פערזענליכע פארנעם. די דאזיגע געלעגנהייט איז געווארן איינגעפירט אויף די ימי הרחמים והסליחות, אין די טעג וואס מען ליינט אין די תורה ווען דער רבי קומט מער ארויס צווישן דעם ציבור.
פארגאנגענע וואך דאנערשטאג פרשת כי תבוא זענען געקומען צום רבי'ן די ילדי הת"ת פון סקווירא שטעטל סניף באר יוסף, די קינדער פון כיתות ז' ח' און ט', און אזוי ווייטער ווען יעדע מאנטאג און דאנערשטאג קומען די קינדער פון א צווייטע תלמוד תורה דחסידי סקווירא.
די קינדער דאווענען מיטן רבינ'ס מנין אין ביהמ"ד הגדול, און האבן די געלעגנהייט צו הערן דעם רבי'ן זאגן ברכת השחר און די ברכות פון קריאת התורה, ווען דער רבי האט עולה געווען ספעציעל לכבוד די קינדער, טראץ וואס עס איז נישט געווען קיין ברית יענעם טאג. נאכן דאווענען זענען די קינדער אריין אל הקודש פנימה, און דער רבי האט געגעבן א טאץ האניג לעקאך פאר יעדן מלמד צו פארטיילן פאר די קינדער אין חדר.
צו דעם געלעגנהייט האט די הנהלת התלמוד תורה געלאזט אין גאנג א ספעציעלע פראגראם זיך צו מחזק זיין אין די לימודים און מידות טובות, מיט ספעציעלע גורלות צו זוכה זיין אויף ספעציעלע מאמענטן, איין קינד פון כתה ח' האט זוכה געווען צו איבערגעבן פארן רבי'ן די צינדער, צו צינדן די ליכט פארן דאווענען, איין קינד פון כתה ז' האט זוכה געווען צו האלטן די צדקה פושקע ווען דער רבי האט אריינגעלייגט צדקה, און איין בחור פון כתה ט' האט זוכה געווען צו מאכן גלילה ווען דער רבי שליט"א מאכט הגבה כנהוג.
