חסידי באבוב תושבי לינדען האבן מיט פרייד אויפגענומען די בשורה משמחת מבית המלך, אז אין די יעצטיגע טעג האט כ"ק אדמו"ר מבאבוב שליט"א געמאלדן אז ער נעמט אויף זיין דריטן איידעם הגה"צ ר' יחזקאל ליפשיץ שליט"א, לכהן פאר אלס דיין און מורה צדק פון די בליענדער קהילה קדושה דחסידי באבוב אין שטאט לינדען אין ניו דזשערזי, לפאר ולרומם די שיינע קהילה צו שטיין לימינם פון די חסידים תושבי העיר.
קהילה קדושה באבוב אין לינדען איז גאר שטארק געוואקסן די לעצטע פאר יאר, עס האלט שוין היינט ביי ארום צוויי הונדערט משפחות, מיט א פולע אוועקגעשטעלטע קהילה קדושה, בנינים אדירים און אלע באדערפענישן, מוסדות הקדושים לשם ולתפארת, פראיעקטן און ארגענעזאציעס ארויסצוהעלפן די חברי הקהילה איינער דעם צווייטן.
על צבאם איז דעם רבינ'ס איידעם הגה"צ ר' יחזקאל ליפשיץ שליט"א וועלכער איז שוין די לעצטע פאר יאר שטארק אקטיוו בתוככי הקהילה, און האט מערערע מאל געפראוועט שיינע שבתים בשליחות הקודש פון חותנו הגדול, געפירט חבורות און געדינט אלס ידא אריכתא פון די חברי הקהילה צום רבינ'ס שטוב בקודש פנימה, אזוי אויך פארקויפט ער די חמץ שוין עטליכע יאר, און איז ערווארטעט זיך אריבערצוציען אין די נאנטע צוקונפט לעמוד לשרת בקודש פונדערנאנט אין דעם קהילה נאה וחסידה.
אין די יעצטיגע טעג האט כ"ק אדמו"ר מבאבוב שליט"א געמאלדן אז מען זאל מודיע זיין פאר די חברי הקהילה אין לינדען איבער די התמנות, און בעז"ה באלד נאך די ימים טובים וועט פארקומען א גרויסע מעמד הכתרה ברוב עם הדרת מלך. אזוי אויך דעם שבת קודש פרשת נצבים, האט מען אין ביהמ"ד באבוב אין לינדען ביי קריאת התורה, געמאכט א מי שברך פארן נייעם דיין, באלד נאך די קביעות'דיגע מי שברך פארן מנהיג העדה כ"ק אדמו"ר מבאבוב שליט"א.
דער נייער דיין הגה"צ ר' יחזקאל ליפשיץ שליט"א, איז א זון פון הרב החסיד ר' אליהו ליפשיץ שליט"א מחשובי חסידי באבוב, ער איז דער דריטער איידעם ביים רבי'ן שליט"א, נאך די צוויי עלטערע וואס האבן שוין באקומען א דיינות פאסטן בקרב חסידי באבוב, הגה"צ ר' חיים שלמה האלבערשטאם שליט"א סגן דומ"ץ באבוב, און הגה"צ ר' חיים דוד וואקסמאן שליט"א דומ"ץ באבוב מאנסי.
