אלפי ישראל גרייטן זיך ארויסצוקומען אין די מאסן ארויסצוהייבן דעם וויי געשריי אין ליכט פון די שרעקליכע גזירות און רדיפת הדת בארץ הקודש, איבערהויפט מיט די ביטערע גזירת הגיוס וואס הויערט אויף אחינו בני ישראל די בחורי הישיבות און אברכי הכוללים, פון וואס צענדליגע זענען שוין ליידער ארעסטירט געווארן דורך די רשעי הציונים אין די פארגאנגענע וואכן רח"ל.
דעם מוצאי שמחת תורה ביים גרויסארטיגן מעמד הבאגלייטן פארנט פון ביהמ"ד הגדול אין קרית יואל, האט כ"ק אדמו"ר מסאטמאר שליט"א מכריז געווען בשער בת רבים איבער די גרויסע עצרת מחאה וואס איז געפלאנט אויף דעם קומענדיגן זונטאג פרשת נח, ווען אלופי אלפי ישראל וועלן זיך צונויפזאמלען אויף די הויפט גאסן אין מאנהעטן, קאנצענטרירט קעגן די ציוניסטישע קאנסולאט, אויסצושרייען דעם קול מחאה אדירה קבל תבל ומלואה.
שמיני עצרת אינדערפרי האט מען אין ביהמ"ד הגדול דקהל יטב לב ד'סאטמאר אין וויליאמסבורג, בנוכחותו פון כ"ק אדמו"ר מסאטמאר שליט"א, אויסגערופן איבער די גרויסע עצרת מחאה וואס וועט פארקומען דעם קומענדיגן זונטאג, דער לאנגיעריגער מנהל הרה"ג ר' משה פריעדמאן שליט"א האט מכריז געווען בהוראת הקודש פונעם רבי'ן אז אלע חסידים זאלן זיך משתתף זיין צו פארזיכערן די שטערקסטע כח המחאה קעגן די רשעות'דיגע ממשלה אין מדינת ישראל וואס פרובירט אריינצוצווינגען אידישע קינדער אין דעם טריפה'נעם מיליטער היל"ת.
אצינד ווערט געמאכט די לעצטע צוגרייטונגען צו קענען אפרעכטן אזא מאסיווע מעמד קידוש שם שמים, די עסקנים האבן שוין ערהאלטן די פערמיטן צו אפשליסן די גאסן און אפהאלטן דעם גרויסן עצרת, און טראנספארטאציע וועט זיין צוגעשטעלט פון אלע היימישע געגנטער ארויסצוברענגען צענדליגע טויזענטער אידן זיך צו משתתף זיין ביי דעם כנסיה לשם שמים.
