מיט געגועים און כיסופין האבן טויזענטער אידן מיטגעהאלטן די צענטע הילולא קדישא, דעם "יובל העשור", צו די הסתלקות פון הגאון הקדוש רבי יורם מיכאל אברג'ל זצ"ל, בצל הקודש פון בנו חביבו הגאון הגדול רבי ישראל אברג'ל שליט"א, אינעם מושב ברור חיל אין דרום ארץ ישראל.
די יומא דהילולא האט זיך אנגעהויבן מיט א גרויסע מעמד הכנסת ספר תורה לזכרו הטהור פונעם בעל ההילולא, ווען פילע אידן רבנים ואישי ציבור זענען מכובד געווארן אריינצושרייבן אן אות אינעם ספר תורה, דערנאך איז פארגעקומען די ריקודין לכבודה של תורה, און נאך תפילת מנחה מעריב איז פארגעקומען די צענטראלע סעודת הילולא און סעודת מצוה לגומרה של תורה.
בנו ממשיך דרכו הגאון רבי ישראל שליט"א האט אויפגעטרעטן מיט א לענגערע דרשה, וואו ער האט געשילדערט די לעצטע טעג פון זיין גרויסן פאטער, וואו ער האט אים געלאזט די צוואה צו ממשיך זיין די הייליגע עבודה צו פארשפרייטן תורה איבער די וועלט, דערביי האט דער גאון אפעלירט צום ציבור אנטייל צונעמען אין די געוואלדיגע פעולות, צו קענען ווייטער מרביץ תורה זיין און משפיע זיין פאר אידישע קינדער איבער די גאנצע וועלט.
