פארגאנגענע וואך פרשת נח איז כ"ק אדמו"ר ממונקאטש שליט"א ארויסגעפארן ממעון קדשו אין בארא פארק, אויף א קורצע נסיעה קיין לאנדאן ענגלאנד, צו באשיינען די שמחת החתונה פון א קינד ביי הגה"צ רבי שמשון גליק זצ"ל דומ"ץ מונקאטש לאנדאן.
דער מונקאטשער דיין זצ"ל פון לאנדאן איז נפטר געווארן מיט פופצן יאר צוריק אין א יונגן עלטער, איבערלאזנדיג א שטוב מיט יתומים אינדערהיים, כ"ק אדמו"ר ממונקאטש שליט"א האט דאן פארשפראכן צו חתונה מאכן די קינדער און זיך פערזענליך באטייליגן, א הבטחה וואס דער רבי שליט"א האט מקיים געווען דורכאויס די יארן, ארויספארנדיג אין די מרחקים צו באשיינען די שמחות פונדערנאנט.
אצינד ווען דער חתן די יונגסטע קינד פונעם דיין זצ"ל איז בשעה טובה ומוצלחת אריינגעקומען בברית הנישואין, האט כ"ק אדמו"ר ממונקאטש שליט"א זיך ווידער ארויסגעלאזט אין וועג צו באשיינען די שמחת החתונה, וואס איז פארגעקומען ראש חודש חשון, מיטוואך פרשת נח, אין די יסודי התורה זאל אין לאנדאן, די חתן איז א אייניקל פון הגה"צ רבי חיים יוסף דוד ווייס שליט"א דומ"ץ סאטמאר אנטווערפן, און די כלה איז א טאכטער פון הגה"צ ר' יוסף יהושע לייפער שליט"א, זון פון כ"ק אדמו"ר מנדבורנא לאנדאן שליט"א, און איידעם ביי הגה"צ רבי יעקב שמשון יאקאבאוויטש שליט"א מגארליץ.
דינסטאג נאכמיטאג נאך תפילת מנחה בביתו נאוה קודש אין בארא פארק, האט זיך דער רבי שליט"א ארויסגעלאזט על עם הדרך, אנקומענדיג קיין לאנדאן פרי פארטאגס האט דער רבי געדאווענט שחרית אינעם לופטפעלד, אינאיינעם מיט א קבוצה נכבדי העדה און מקורבים. פון דארט איז דער רבי אריינגעפארן צו די סטעמפארד הילל געגנט, וואו דער רבי האט געהאט די אכסניא אין שטוב פון הנגיד החסיד ר' חיים משה ליפשיץ, ראש הקהל מונקאטש אין לאנדאן.
נאכמיטאג האט דער רבי אויפגענומען מיט קוויטלעך עטליכע יחידי סגולה נדיבים בעם, וואס האבן זיך אנגערופן מיט ריזיגע סכומים לטובת די קרן הבנין פון די נייע מונקאטשער ביהמ"ד אין לאנדאן. שפעטער אויפדערנאכט האט דער רבי שליט"א באשיינט בראש השמחה, דער רבי איז מכובד געווארן מיט סידור קידושין, און האט געטאנצן מצוה טאנץ לפני הכלה בעוז ותעצומות. אינמיטן די שמחה האט דער רבי באזוכט אין שטוב פון הנגיד החסיד ר' אלי'ש ענגלענדער הי"ו.
צומארגנס דאנערשטאג יום ב' דראש חודש חשון האט דער רבי געדאווענט שחרית בבית מדרשו קהל מנחת אלעזר מונקאטש אויף קעיזינאוו ראוד אין די סטעמפארד הילל געגנט אין לאנדאן, נאכגעפאלגט מיט א מסיבת לחיים לכבוד ראש חודש. שפעטער אין טאג איז פארגעקומען א רייכע מסיבת פת שחרית בבית האכסניא אין שטוב פון ר' חיים משה ליפשיץ ראש הקהל מונקאטש לאנדאן, געאייגענט פאר די נדיבים בעם וואס האבן זיך אנגעשלאסן מיט סכומים אדירים לטובת דער קרן הבנין פונעם נייעם מונקאטשער ביהמ"ד אין לאנדאן, במשך די מסיבה האט דער רבי משמיע געווען דברות קודש און פארטיילט א מנחת זיכרון פאר אלע משתתפים. שפעטער נאכמיטאג איז דער רבי ארויסגעפארן אויפן וועג אהיים צוריק קיין בארא פארק.
