צום ענדע פון די ימי השבעה נאך די פטירה פון האשה החשובה מרת ליבא ווערדיגער ע"ה, זעהט זיך אן די געוואלדיגע קידוש השם וואס האט זיך געשאפן אין לויף פון די ימי השבעה, ווען טויזענטער אידן פון נאנט און ווייט האבן געשטראמט צו מנחם אבל זיין דעם אדם היקר באנשים, דער בארימטער פילאנטראפ און תומך תורה, וועלכער טראגט אויף זיינע פלייצעס גאר אסאך לטובת די גאנצע יהדות החרדית.
אינעם בית האבלים וואו ר' שלמה איז געזעסן, זענען אנגעקומען הונדערטער אדמורי"ם ורבנים, גרויסע חסידישע רבי'ס און ראשי ישיבות, באקאנטע פאליטיקאנטן און הויכראנגיגע באאמטע פון איבערן גאנצן לאנד, וועלטס גבירים און פילאנטראפן וואס זענען געקומען מנחם זיין ר' שלמה, דער יושב ראש פון אגודת ישראל דאמעריקע, און נשיא פון איחוד מוסדות גור.
יעדע גרויסע חסידות האט געשיקט א דעלעגאציע צו מנחם אבל זיין, צווישן זיי כ"ק אדמו"ר מסקווירא שליט"א וועלכער האט געשיקט זיינע קינדער בשליחות הקודש, אדמורי"ם וראשי ישיבות מעבר לים האבן געשיקט בריוו אדער זיך פארבינדן אויפן טעלעפאן, צווישן זיי כ"ק אדמו"ר מוויזניץ שליט"א, מרנן ורבנן ראשי ישיבת סלאבאדקע, הגאון הגדול רבי דוב לאנדא שליט"א, און הגאון הגדול רבי משה הלל הירש שליט"א. הגאון רבי בערל לאזאר שליט"א דער הויפט רב פון רוסלאנד, נאך גרויסע רבנים בארץ הקודש, רבני העדה החרדית און נאך פיל.
איבער אלעם האט ארויסגעשיינט די ספעציעלע טרייסט וואונטשן פון כ"ק אדמו"ר מגור שליט"א, וועלכער האט אליינס מנחם אבל געווען דורכ'ן טעלעפאן, און האט אין א זעלטענע שריט ארויסגעשיקט בנו חביבו הגה"צ רבי נחמיה אלתר שליט"א וועלכער האט אונטערגענומען דעם לאנגן נסיעה בשליחות הקודש צו מנחם אבל זיין ר' שלמה. ווי אויך דער יושב ראש פון איחוד מוסדות גור הרב יונתן בורנשטיין שליט"א וועלכער איז ספעציעל געקומען צו פארן אויף ניחום אבלים.
מענטשן וואס זענען געווען מנחם אבל זיין האבן מעיד געווען אויף די זעלטנקייט אין היסטאריע וואס מען האט געזעהן דארט, ווען טויזענטער טויזענטער אידן האבן געשטראמט אומאויפהערליך צו מנחם אבל זיין, ווען יעדער באקומט אויפמערקזאמקייט מיט אינטערעסע.
