אומבאשרייבליכע חיזוק און התרגשות פאר די צענדליגער קינדער פון 'הבן יקיר' ד'חסידי גור בארה"ב, נאך לענגערע באזוך פון הרה"צ ר' שלמה צבי אלתר בן האדמו"ר מגור
די צענדליגע קינדער פונעם 'הבן יקיר' ארגאנעזאציע געפינען זיך די טעג אין א זעלטן מרוגש'דיגע אטמאספערע, נאכן מיטלעבן א גאר געהויבענע באזוך פון הרה"צ ר' שלמה צבי אלתר שליט"א בנו חביבו פון כ"ק אדמו"ר מגור שליט"א, וועלכער האט אריינגעבלאזן עמערס חיזוק און חיות דקדושה און זייערע הערצער, מיט א זעלטענע ווארעמקייט און פארשטאנד צו זייער שווערן מצב.
דער הייליגער ארגאניזאציע 'הבן יקיר' איז נתייסד געווארן דורך כ"ק אדמו"ר מגור שליט"א און ווערט געפירט דורך בנו הרה"צ ר' שלמה צבי שליט"א, און איר מטרה איז צו געבן חיזוק בגשמיות וברוחניות פאר קינדער וועלכע האבן פארלוירן זיירע עלטערן און פאר זייערע משפחות מקרב חסידי גור און טוט זיי באגלייטן אויף טריט און שריט, די ארגאניזאציע האלט אויך אויף אן עקסטערע אפטיילונג פאר די סארט משפחות חסידי גור אין אמעריקע,
אצינד איז הרה"צ ר' שלמה צבי געקומען קיין אמעריקע צו באשיינען א רייע שמחות און מרעיף זיין טללי תחיה אויף די חשובע קינדערלעך און משפחות פון 'הבן יקיר', ווען צום הויכפונקט איז געפראוועט געווארן א גאר געהויבענע שבת התאחדות מיט די קינדערלעך, וועלכע זענען אנגעפולט געווארן מיט גאר אסאך חיזוק והתעלות ביי די לעכטיגע סעודות און פארברענגנס, האבנדיג דעם רבינ'ס זון אויף זייער טיש מיט איבערגעגעבנקייט און פארשטאנד.
די מעמדי קבלת פנים
מיטוואך פרשת לך לך איז דער חשובער גאסט אנגעקומען קיין אמעריקע, און באלד צוגעפארן קיין לעיקוואד וואו עס איז פארגעקומען א ספעציעלע אויפנאמע מיט ארום צוואנציג אינגעלייט פון אלע קרייזן וואס האבן ל"ע פארלוירען זייער אשת חיל רח"ל און האבן איינגעלאדנט רבי שלמה צבי. טראץ וואס די אינגעלייט האבן זיך נאך פריער קיינמאל נישט פערזענליך געטראפן מיט הרה"צ ר' שלמה צבי, זענען זיי איבערראשט געווארן פון זיין זעלטענע געטריישאפט, און מיטגעפיל וואס ער האט צו די סארט פאסירונגען.
הרה"צ ר' שלמה צבי האט אויפגעטראטן מיט טיפע יסודות און עצות וויאזוי צו פירן די שטוב און זיך האלטן שטארק אפילו די שווערע מצבים. פון וואס די אינגעלייט זענען ארויס מלא חיזוק והתרגשות, שפירנדיג די איבערגעגעבענע ווארימקייט.
דערנאך איז פארגעקומען א ספעציעלע אויפנאמע מיט די קינדער פון 'הבן יקיר', א רייכער מעמד קבלת פנים פאר א לענגערע צייט, וואו די קינדער האבן זיך באגריסט מיטן חשובן גאסט, און ערהאלטן א רייכע מתנה וואס ער האט געברענגט פון ארץ ישראל. הרה"צ ר' שלמה צבי האט גערעדט צו זיי דברי חיזוק און זיך אויפגעשטעלט טאנצן א לענגערע צייט.
מיטוואך אויפדערנאכט האט הרה"צ ר' שלמה צבי באשיינט א שמחת החתונה וואס איז פארגעקומען אין לעיקוואד, וואו הרה"צ ר' שלמה צבי האט זיך באטייליגט פאר לאנגע שעות, געטאנצן לעבעדיג מיט אלע בני המשפחה, און אריינגעברענגט א זעלטענע פרייד אין יעדן איינציגן קינד, און געגעבן דעם אטמאספער ווי גלייך דאס וואלט געווען זיין אייגן קינד.
במשך דעם טאג האט זיך דער חשוב'ער גאסט משתתף געווען ביי עטליכע מעמדים מלאי התרגשות והתעוררות, און פארנאכטס איז מען געפארן קיין לעיקוואד צו באשיינען די שמחת השבע ברכות פון די נעכטיגע שמחה, פרייטאג אינדערפרי האט ער געדאווענט תפילת שחרית אינעם גערער שטיבל אין לעיקוואד, און דערנאך געפראוועט א מסיבת לחיים און אויפגעטראטן מיט א שמועס.
דערנאך איז הרה"צ ר' שלמה צבי אנגעקומען אויף א באזוך אין תלמוד תורה מסורת אבות אין לעיקוואד בהנהלת הרב פסח משה גראססמאן, וואו ער האט באשיינט די וועכנטליכע מעמד לקראת שבת, איבערגעגעבן א שמועס בעניני קדושת שבת, און פארטיילט ממתקים פאר די קינדערלעך.
די ערשטע שבת אין בארא פארק
שבת קודש פרשת לך לך האט הרה"צ ר' שלמה צבי געפראוועט אינעם עיר ואם בישראל בארא פארק, ביי דעם אכסניה פון ר' נחמיה עקשטיין א זון פון מחותנא דבי נשיאה הרה"ח רבי משה עקשטיין שליט"א, וואו ער האט פרייטאג צונאכטס באשיינט די שמחת הבר מצוה אין שטוב פון הנגיד החסיד ר' יעקב קליין הי"ו מנכבדי קהילת הקודש דחסידי גור דער זון פון הבלתי נשכח הרבני רבי אברהם נח הלוי קליין זצ"ל חתן הרב אברהם מרדכי הארען פון ירושלים. הרה"צ ר' שלמה צבי האט דארט געגעסן די סעודה אינאיינעם מיט די רבני ונכבדי קהילת גור און המשפחות המעטירות און די קינדער פון הבן יקיר, און אויפגעטרעטן מיט דברי תורה און דברי חיזוק ביים סעודה.
א ספעציעלע התרגשות איז געווען ביי די תלמידים ווען הרה"צ ר' שלמה צבי האט איבערגעגעבן דעם שליחת הקודש פון אביו כ"ק מרן האדמו"ר מגור שליט"א וועלכע האט אים געהייסן איבערגעבן פאר די תלמידים, "טראץ דעם ריחוק המקום זענען זיי ביי מיר נאנט". אזוי אויך האט דער חשוב'ער גאסט שליט"א פארטיילט פאר די תלמידים מיני מתיקה וואס אביו הגדול דער רבי שליט"א האט מיט אים מיגעשיקט פאר די תלמידים.
שבת אינדערפרי האט ער געגעסן די סעודה אינאיינעם מיט די תלמידי הישיבה, יעדער בחור איז אריבער וואונטשן לחיים, און הרה"צ ר' שלמה צבי האט זיך אינטערסירט ביי יעדן פערזענליך אויף זיין הצלחה אין לערנען און עניני עבודת השם. שלש סעודות האט ער געפראוועט אויף א גרויסע פארנעם אין די שטיבל "ברכת אליהו" מיט די באטייליגונג פון א גרויסע ציבור חסידים תושבי העיר מיט דעם מרא דאתרא הרב הערשל ראטענבערג שליט"א און רבני גור.
מלוה מלכה איז געפראוועט געווארן אויף א פראכטפולע פארנעם, אין די אפיסעס פון הרבני הנגיד ר' בנימין בייטעל הי"ו, קאמבינירט מיט א רייכע דינער לטובת די "הבן יקיר" ארגענעזאציע, וואס שטעלט צו די אלע אקטיוויטעטן פאר זיי. עס האבן זיך באטייליגט צענדליגע נגידים ושועים, וואס האבן געהערט א זעלטן אינהאלטסרייכע דרשה פונעם חשובער גאסט, וועלכע האט גאר שטארק גערעדט פון די זכיה ארויסצוהעלפן דעם הייליגן ארגאנעזאציע.
צווישן אנדערע האט הרה"צ ר' שלמה צבי פארגעלייגט פאר די גבירים, וואס זיי וואלטן געוואלט זען פאסירן אויב עס פאסירט א טראגעדיע רח"ל אין די אייגענע משפחה, און ווי שטארק מ'דארף פארזארגן די וואס מאכן דאס ליידער מיט, גענוי ווי מען וואלט געוואלט מ'זאל זיך זארגן פאר די אייגענע קינדער.
באזוך אין די מוסדות הקדושים
זונטאג אינדערפרי איז הרה"צ ר' שלמה צבי אנגעקומען אויף תפילת שחרית אין מכינה לישיבה בית ישראל אין בארא פארק, נאכן דאווענען האט ער געפראוועט א "טרונק", און אויפגעטרעטן מיט א שיינעם שמועס. דערנאך האט ער באזוכט אין תלמוד תורה אמרי אמת דחסידי גור וואו ער איז ארומגעגאנגען אין אלע קלאסן און מחזק געווען די תלמידים, ארומגערעדט איבער די גרויסע יארצייט פון רחל אמינו, און פארהערט די קינדער אויף זייערע לימודים.
אזוי אויך האט ער באזוכט אין די כולל מזומנים, וואו עס איז פארגעקומען א גרויסע בחינה פאר א לענגערע צייט, הרה"צ ר' שלמה צבי האט זיך אינטערסירט ביי אלע אינגעלייט און געגעבן דברי חיזוק ועידוד. אזוי אויך האט ער באזוכט אין די כולל המרכזי דחסידי גור אין בארא פארק, אין שפיץ פונעם ראש הכולל הרב מאיר ווידיסלאווסקי שליט"א, וואו ער האט מיטגעהאלטן א בחינה דורך הרב וויליגער שליט"א.
שפעטער ביינאכט איז ער ארויסגעפארן קיין מאנסי, צו באשיינען די שמחת החתונה פאר לענגערע שעות האט ער באשיינט די שמחה און געטאנצן גאר לעבעדיג, אויפהייבנדיג דעם גאנצן אטמאספער און אריינגיסנדיג עמערס חיזוק אין אלע בני המשפחה.
מאנטאג אינדערפרי האט ער געדאווענט שחרית אין די גערער שטיבל אין מאנסי, און דערנאך געפראוועט א "טרונק".
שפעטער ביינאכט האט ער באשיינט א אסיפה פאר אלע עלטערן פון אירגון "כל בניך", וואס איז פארגעקומען אין שפיץ פון הגה"צ ר' אהרן נח אלתר שליט"א נכדו חביבו פון כ"ק אדמו"ר מגור שליט"א.
דינסטאג אינדערפרי האט דער חשובער גאסט געדאווענט אין די גערער שטיבל ברכת אליהו אין בארא פארק, וואו עס איז דערנאך פארגעקומען א ברית מילה ביי איינער פון די חסידים. דערנאך האט ער זיך באטייליגט ביי די לוויה פון האשה החשובה מרת בריננער ע"ה, אשת הנגיד החסיד ר' יוסף ארי' בריננער הי"ו מגדולי התומכים פון מוסדות גור דורך דעם גרויסן מבצר התורה 'תורתו' וואס איז מרבה תורה ביי טויזענטער יונגעלייט, הרה"צ האט זיך משתתף געווען ביים גאנצן לוויה עד לאחר הקבורה.
שפעטער נאכמיטאג האט ער באשיינט די שמחת החתונה ביי איינער פון די חסידים, און דערנאך ארויסגעפארן פון שטאט, וואו ער האט באזוכט אין שטוב פון א א תלמיד פון 'הבן יקיר' וואס האט בר מצוה די קומענדיגע וואך. הרה"צ ר' שלמה צבי האט געפראוועט א מסיבה לכבוד די שמחה, און פאר אנדערטהאלבן שעה געטאנצן לעבעדיג מיט גרויס שמחה.
אזוי אויך האט ער באזוכט אין שטוב פון הרבני הנגיד ר' שלמה ווערדיגער הי"ו, און מנחם אבל געווען ביי הרבני הנגיד ר' יוסף ארי' בריננער הי"ו, און אויך באזוכט אין שטוב פון הרבני הנגיד ר' בנימין בייטעל הי"ו, וועלכער טראגט אויף זיינע פלייצעס אלע הוצאות פון מפעל "הבן יקיר" אין אמעריקע.
אזוי אויך איז פארגעקומען א ספעציעלע כינוס להרבות תורה בישראל, פאר ארום דריי הונדערט אינגעלייט און בעלי בתים, וואס פארהערן זיך אויף איבער הונדערט בלאט גמרא אין ראם פון "מזומנים".
זעלטן געהויבענע שבת מיט די תלמידים פון 'הבן יקיר'
צום הויכפונקט פון די ביקור המרומם איז געפראוועט געווארן די גאר געהויבענע שבת, ווען די צענדליגע תלמידים פון די 'הבן יקיר' ארגאנעזאציע האבן געהאט די זכיה צו פארברענגען אינאיינעם מיטן חשובן גאסט, וועלכער האט ווידער אריינגעבלאזן הויפנס חיות דקדושה אין זייערע הערצער.
די שבת איז געפראוועט געווארן אין א פראכטפולע לאקאל בגלילות קרית יואל, און דאנערשטאג נאכט אנקומענדיג קיין קרית יואל, איז מען צוערשט ארויף אויף א באזוך בביתו נאוה קודש פון כ"ק אדמו"ר מסאטמאר שליט"א, וועלכער האט באוואונדערט די פעולות פון הרה"צ ר' שלמה צבי און די גאנצע ארגאניזאציע, און מיט פאסיגע ווערטער מחזק געווען די קינדערלעך בדברי חיזוק ועידוד.
פרייטאג דורכ'ן טאג איז הרה"צ ר' שלמה צבי ארויס אויף א שפאציר אינאיינעם מיט די קינדערלעך, און אזוי אויך שבת נאכמיטאג בעפאר די סעודה פאר א לענגערע צייט.
ביי קבלת שבת פרייטאג צונאכטס האט מען מאריך געווען בשירות ותשבחות, ווען ביי יעדע שטיקל פון לכה דודי זינגט מען א אנדערע טאנץ ניגון מיט גרויס שמחה. די סעודה פרייטאג צונאכטס האט זיך פארצויגן פאר לאנגע שעות, און יעדעס קינד האט געהאט די געלעגנהייט אויפצוטרעטן מיט א דרשה און ארויסגעבן זיינע געפילן, ווען הרה"צ ר' שלמה צבי באגריסט יעדן פערזענליך מיט טרעפליכע דברי חיזוק.
די גאנצע סדר השבת איז אריבער מיט גרויס התעוררות אין א גאר געשמאקע אטמאספער, באגלייט מיט דברי חיזוק ונחמה אין יעדע געלעגנהייט, מוצאי שבת האט מען באזוכט ביי כ"ק האדמורי"ם מסקווירא און וויזניץ מאנסי שליט"א, און דער סקווירא רבי האט פארטיילט פאר יעדן קינד א פרי און זיך אינטערסירט אין זייער וואוילזיין.
א מלוה מלכה צום געדענקען
צום שלוס פון די געהויבענע באזוך איז פארגעקומען א גייסטרייכע סעודת מלוה מלכה אין מאנסי, אין שטוב פון הרבני הנגיד ר' בערל קארניאל שליט"א, מייסד מפעלים אדירים לתורה, נשיא מכון להוראה ויו"ר מפעל הכביר "ושננתם", וואו די תלמידי הבן יקיר האבן זיך געוואשן צו א רייכע סעודה, און פארברענגט מיטן חשובן גאסט פאר לענגערע שעות.
א ספעציעלע איבערראשונג איז געווען ווען דער בארימטער קאמפאזיטאר און בדחן ר' הערשי וויינבערגער הי"ו איז אנגעקומען צום מלוה מלכה, און אויסגעפרעגט אלע קינדער איבער זייערע געפילן נאך דעם גרויסן דערהויבענעם שבת. דאן האט ער אנגעהויבן גראמען מיט קונסט, און אויפגעברענגט די אלע געפילן פון די קינדערלעך אין די הארציגע גראמען.
דאן האט מען מקבל געווען בהדרת כבוד כ"ק אדמו"ר מראחמיסטריווקא שליט"א פון ספרינג וואלי, וועלכער האט אויפגעטרעטן מיט ווערטער, און דערמאנט אז ער אליינס איז געווען א יתום אלס קינד, ווי שטארק עס האט אים וויי געטון און וויאזוי ער האט זיך מחזק געווען. עס האט נאכגעפאלגט מיט א געלונגענע פארשטעלונג דורך הני תרי בדחני ר' וועלוול פעלדמאן און ר' יעקב יוסף לאנגזאם הי"ו, וועלכע האבן אריינגעבלאזן שמחה ואורה אין אלע פארזאמלטע.
עס איז שוין געווען נאנט צו פיר אזייגער פארטאגס ווען הרה"צ ר' שלמה צבי האט זיך געזעגענט פון די חשובע קינדערלעך, און פארטיילט א ספעציעלע מזכרת פאר יעדעס קינד באזונדער.
דער רייכער באזוך האט אריינגעבלאזן חיזוק אין אלע תלמידים פון 'הבן יקיר', און וועט זיי אי"ה באגלייטן זייער גאנץ לעבן.
