היינט זונטאג פארטאגס האט כ"ק אדמו"ר מוויזניץ שליט"א לרפו"ש געלאנדעט בשלום אויפן ניו יארקער באדן, קומענדיג קיין אמעריקע צו באשיינען צוויי שמחות במעון קדשו, די שמחת החתונה פון א אייניקל וואס קומט פאר מארגן מאנטאג אין שיכון סקווירא, און די שמחת החתונה פון נאך א אייניקל וואס קומט פאר דעם מיטוואך אין שיכון וויזניץ מאנסי.
דער רבי שליט"א האט זיך ארויסגעלאזט אין וועג שפעט מוצאי שבת, נאך א געהויבענע שמחת הפארשפיל און מעמד צאתכם לשלום אין ביהמ"ד הגדול אין שיכון וויזניץ בני ברק, אנקומענדיג קיין ניו יארק היינט פארטאגס האבן אפגעווארט דעם רבי'ן עטליכע בני המשפחה און די נאנטע מקורבים.
דער רבי שליט"א האלט זיך אויף בבית האכסניא אין שטוב פון הנגיד החסיד ר' אביגדור עסטרייכער הי"ו אין שיכון סקווירא, וואו עס איז צוגערישט געווארן פילע איינריכטונגען פארן רבי'ן און די פמליא. די בארימטע רענטעסטיק פארטי רענטל פירמע איז גערופן געווארן אויפצושטעלן א גרויסע שאטער פארנט פון די אכסניא, צו ערמעגליכן צוצושטעלן אלע באדערפענישן פארן רבי'ן דורכאויס די באזוך.
לויטן פלאן וועט דער רבי שליט"א זיך אויפהאלטן בבית האכסניא ביז דאנערשטאג אינדערפרי, דאנערשטאג וועט דער רבי אריינפארן אין שפיטאל פאר רוטינע באהאנדלונגען, און אויף שבת וויילן אויף אפרוה מחוץ לעיר. נאך שבת וועט זיך דער רבי אומקערן אהיים למעון קדשו אין ארץ ישראל.
