פארלאפענע וואך מיטוואך שפעט אויפדערנאכט, נאך א לאנגע טאג וואס כ"ק אדמו"ר מסאטמאר שליט"א האט אויפגענומען טויזענטער חסידים סיי אין בית שמש און סיי אין ירושלים, איז דער רבי שליט"א אנגעקומען אויף א באזוך אין די הויפטקוואטירן פון די מעלה ארגענעזאציע אין ירושלים, וואס ווערט פאררעכנט אלס די גרעסטע צענטער פאר הילף און חינוך מיוחד אויף אן ערליכע שטייגער אין ארצה"ק.
מעלה איז די איינציגסטע הילף צענטער פאר קינדערלעך וועלכע רעדן די אידישע שפראך ארום גאנץ ארץ ישראל און האט שוין סערווירט טויזענטער קינדערלעך פון ארום גאנץ ארץ ישראל און אויך פון אמעריקא, עס איז א אימפעריע פון היילונג און חינוך פאר קינדער וואס מוטשענען זיך מיט פיזישע אדער גייסטישע פראבלעמען, פון קליינע פראבלעמען ביז ערענסטע פעלער, מעלה שטעלט צו א העכסט פראפעסיענאלע שטאב פאר אלע סארט הילף און טעראפי.
ווען דער רבי שליט"א איז אנגעקומען צו די טויערן פון מעלה אויף מאה שערים האט שוין די זייגער געוויזן אויף 2:15, אבער דער רבי שליט"א האט במאור פניו קענטליך גענאסן און הנאה געהאט זיך ארומצוקוקן און זען די הויכע קוואליטעט פון הילף וואס מעלה שטעלט צו. צוערשט האט דער רבי שליט"א ארומשפאצירט צווישן די פולע מעדעצינישע און טעראפי צימערן, פון דאקטאר און דיאגנאז צימערן ביז די פארשידענע טעראפי צימערן, דער רבי שליט"א האט זיך אומגעקוקט און געהערט א באריכט פון די געטרייע הנהלה פון מעלה, הר"ר אשר אייזנבאך שליט"א, הר"ר יונה קלאפהאלץ שליט"א און הר"ר עקיבא בערגמאן שליט"א, אין שפיץ פון דער געטרייער הר"ר יואל וואלדמאן שליט"א וועלכע לייגט אריין לב ונפש צו פארזיכערן אז מעלה זאל קענען אנגיין מיט די עבודת הקודש.
ווי אויך האט דער רבי שליט"א זיך פאראינטערסירט און אויסגעהערט די פלענער פון הרחבת גבולי הקדושה, די נייע שטאק און די נייע אפטיילונג וועלכע ווערט יעצט געבויט אין מאה שערים, ספעציעלע גרויסע בוי פלענער זענען אנגעגרייט געווארן פארן באזוך און דער רבי שליט"א האט געקענט האבן א קלארע איבער בליק פון פלענער און די פארשריט, אזוי אויך האט דער רבי שליט"א געהערט פון נייע פראגראמען אין ערליכע מוסדות התורה איבער גאנץ ארץ ישראל.
דער רבי שליט"א האט אויסגעדרוקט התפעלות פון די געטריישאפט און הויכע קוואליטעט הילף, אז מען קוקט אוועק אויף געלט און מען זוכט די מערסטע תועלת אין די קורצטע צייט, דער רבי שליט"א האט דערנאך געמאכט א לחיים און געווינטשען די נדיבי לב וועלכע שטיצן די הייליגע אונטערנעמונג, ספעציעל האט דער רבי שליט"א געקוואלן צו זען די שילדן פון די נדיבי לב חסידי סאטמאר וועלכע האבן מנדב געווען פארשידענע צימערן און טיילן פון די מעלה הויפטקווארטירן.
די זון האט שוין באלד אויפגעשיינט ווען דער רבי שליט"א האט בקורת רוח פארלאזט די מעלה הויפטקווארטירן צו די אכסניא מיט א קענטליכע הנאה, קוועלנדיג פון די הערליכע בליענדע הילף פון מעלה.
