מיט גרויס שמחה ווערט היינט אפגעצייכנט א היסטארישע אנטוויקלונג אינעם עיר התורה והחסידות מאנסי, ווען עס ווערט געפראוועט די ערשטע חתונה אין די נייע פראכטפולע חתונה זאל "עטרת גינענדל", וואס אנטשפרעכט אריינצוברענגען א שטארקע פריידיגע הילף פאר מאנסיער איינוואוינער בעת שמחתם.
די נייע חתונה זאל איז איינקוואטירט אין די נייע בנין פון בית חינוך לבנות "בית אסתר" דחסידי סאטמאר אין מאנסי, און איז אין די לעצטערע חדשים אריבער א העפטיגע בוי פראיעקט אהערצושטעלן דעם זאל כראוי וכיאות צו פראווענען דארט אידישע שמחות מיט הרחבת הדעת. בלויז ניין חדשים איז אריבער זינט מען האט געלאזט אין גאנג די בוי ארבעט, ווען יעדן טאג נאכאנאנד האט מען געארבעט לאנגע שעות צו זעהן דעם פראכטפולן זאל עומד על תילה.
טראץ וואס די חתונה זאל איז געווידמעט צו פראווענען דארט היימישע שמחות מיט תקנות, איינצושפארן פאר די מחותנים גרויסע געלטער, נישט צו פארבלייבן מיט חובות בעידן חדוותא, איז עס אבער געבויעט מיט פראכט עלעגאנטפול. היינט נאכמיטאג האט מען קובע געווען די מזוזות אין א מזל'דיגע שעה, ווען די גאנצע זאל איז פיקס פארטיג צום ערשטן חתונה, וואס קומט פאר היינט אויפדערנאכט בשעה טובה ומוצלחת.
