א זעלטענע שמחה וחדוות התורה האט ארומגענומען די טויזענטער תינוקות של בית רבן, תלמידים אין ת"ת בני ציון ד'באבוב אין בארא פארק, ווען עס איז געפראוועט געווארן א געהויבענע מעמד הכנסת ספר תורה בין כותלי התלמוד תורה, ווען די הויפט מחותנים זענען געווען די חשובע קינדערלעך לומדי תורה.
די ספר תורה איז אריינגעגעבן געווארן דורך משפחת רובין הנכבדה, לזכר נשמתו פון הנגיד החסיד ר' לייבל רובין ע"ה וועלכער איז נפטר געווארן מיט צוויי יאר צוריק עשרה בטבת, און האט מנדב געווען די אסטראנאמישע קאסטן פונעם גיגאנטישן בנין התלמוד תורה "בנין לייבל רובין" אויף די זעקס און דרייסיגסטע סטריט.
דורכאויס די לעצטע פאר וואכן האבן די חשובע קינדערלעך מיטגעהאלטן און זיך צוגעגרייט צום גרויסן מעמד לכבודה של תורה, די קינדער האבן געלערנט און געזעהן די הלכות פון כתיבת ספר תורה, און אליינס געהאט די געלעגנהייט מיטצוהאלטן די כתיבת ספר תורה, ווען יעדע כיתה באזונדער האט געזעהן ווי זייער מלמד שרייבט אן אות אינעם ספר תורה, און דערנאך זענען אלע קינדער אריבער כאפן א בליק אינעם הייליגן ספר תורה.
די גרויסע מעמד הכנסת ספר תורה וואס איז פארגעקומען נעכטן מאנטאג ויחי ט' טבת, איז געווען געווידמעט ספעציעל פאר די טויזענטער ילדי הת"ת, אין שפיץ פון כ"ק אדמו"ר מבאבוב שליט"א וועלכער האט אריינגעשריבן די לעצטע אותיות, און געטאנצן לעבעדיג לכבודה של תורה ותומכיה.
די ריקודין של שמחה איז פארגעקומען אין די פראכטפולע הייטנער זאל בבנין הת"ת, וואו אויף הויכשטאקיגע פארענטשעס זענען געשטאנען די טויזענטער קינדערלעך און זיך מיטגעפריידט בשמחת התורה, דער רבי האט אפגעראכטן די ריקודין א לענגערע צייט, א באזונדערע ריקוד מיט די חשובע נדיבים די קינדער פון הנגיד ר' לייבל רובין ע"ה, א באזונדערע ריקוד מיט די בני משפחת המלוכה, און א באזונדערע ריקוד מיט די מרביצי תורה אין תלמוד תורה.
א טאלאנטפולע כאר פון תלמידי הת"ת האבן מהנה געווען בשירה וזמרה, און ביים מסיבת לחיים נאכן אויפטרעטן מיט דברות קודש, האט דער רבי שליט"א פארטיילט שיריים און געוואונטשן פאר יעדן קינד באזונדער, וואס האט זיך פארצויגן איבער א שעה צייט.
