א דריגענדע אסיפת הרבנים איז פארגעקומען די וואך זונטאג אין שטאט לעיקוואד, וואו א רייע גדולי ישראל, אדמורי"ם רבנים און ראשי ישיבות, האבן דורכגעשמועסט די לעצטיגע אויפשטייג פון עי איי באנוץ, די מעגליכקייט פאר יונגע בחורים צו פרעגן פראגעס פון עי איי אויפן טעלעפאן, טראץ וואס מען פארמאגט א שטארקע שמירה קעגן טעכנעלאגישע כלים.
די אסיפה איז פאררופן געווארן דורך הגאון הגדול רבי אליהו בער וואכטפויגל שליט"א ראש ישיבת זכרון משה אין סאוט פאולסבורג, עס האבן זיך באטייליגט די ראשי הישיבה פון בית מדרש גבוה ד'לעיקוואד, הגאון הגדול רבי ארי' מלכיאל קאטלער שליט"א, הגאון הגדול רבי ירוחם אולשין שליט"א, הגאון הגדול רבי דוד שוסטאל שליט"א, און הגאון הגדול רבי ישראל ניומאן שליט"א.
צווישן די חסידישע רבנים וואס האבן זיך באטייליגט האט זיך אנגעזעהן כ"ק אדמו"ר מראחמיסטריווקא שליט"א פון לעיקוואד, כ"ק אדמו"ר מסקולען שליט"א פון לעיקוואד, כ"ק אדמו"ר מנאוואמינסק שליט"א, הגה"צ ר' יעקב שרגא הורוויץ שליט"א אבד"ק זרע קודש וראש ישיבת בית מאיר, הגה"צ ר' מיכל שטיינמעטץ שליט"א דומ"ץ סקווירא ב"פ ובעל משיב נבונים, הגה"צ ר' יחזקאל אונגער שליט"א בן כ"ק אדמו"ר מבאבוב 45 שליט"א, און הרה"ג ר' אברהם יצחק לונגער שליט"א דומ"ץ סקווירא בעיטס אין מאנסי.
