דעם זונטאג פרשת וארא, צום אנהייב פון די צווייטע וואך פון די ימי השובבי"ם, איז פארגעקומען א גרויסע אסיפת התעוררות אין ביהמ"ד הגדול באבוב 45, וואו טויזענטער חסידים האבן זיך פארזאמלט זקנים עם נערים לשמוע את דבר ה', אויפן פערזענליכן בקשה פון כ"ק אדמו"ר מבאבוב 45 שליט"א.
יאר יערליך טוט דער רבי שליט"א משמיע זיין דברי התעוררות ביי שלש סעודות לרגל די ימי השובבי"ם, דאס יאר אבער האט דער רבי געבעטן צו פארזאמלען דעם גאנצן ציבור פאר א צענטראלע אסיפה, און דער רבי שליט"א האט א לענגערע צייט משמיע געווען דברות קודש איבער די חשיבות פון תפילה בכלליות, און בפרט בימי השובבי"ם.
דער רבי האט ערווענט די געוואלדיגע כח התפילה וואס זעהט זיך אן ביים ציבור, בפרט אין די לעצטע תקופה זינט מען האט זיך אריינגעצויגן אין די נייע ביהמ"ד. דער רבי האט אויסגעדרוקט שטארקע הנאה פון דעם אז דער גאנצער ציבור איז שטיל ביים דאווענען און קריאת התורה, און וויאזוי דער ציבור דאווענט מיט א פלאם פייער בפרט ביי פסוקי דזמרה ביום השבת.
צווישן אנדערע האט דער רבי מעורר געווען איבער די ענין פון מאה ברכות יעדן טאג, קומען צייטליך צום דאווענען און אינזין האבן בכוונה יתירה ביי די צוויי ברכות וואס זענען מן התורה, אויך האט דער רבי דערמאנט די הלכה אז מען טאר נישט מרמז זיין מיטן מויל בשעת'ן דאווענען, וואס מאנכע זענען זיך טועה און מיינען אז דאס איז מותר.
צום שלוס איז פארטיילט געווארן פארן גאנצן ציבור א שטר קבלה, זיך אונטערצונעמען נישט צו רעדן ביי די תפילות שבת, סיי ביינאכט ביים גאנצן דאווענען און סיי אינדערפרי, וואס דאס נעמען זיך די חסידים אונטער מדי שנה בשנה בימי השובבי"ם, דאס יאר איז צוגעלייגט געווארן נאך א קבלה אז מען זאל קומען פרי צום דאווענען, און די חסידים זענען אריבער איבערגעבן די קבלה צעטלעך פארן רבי'ן, און זיך געזעגענען איידער דעם רבינ'ס נסיעה קיין אריזאנע אויף אפרוה.
אין די זעלבע צייט האבן די חסידים פון אנדערע שטעט זיך צוזאמגענומען אין די בתי מדרשים, און מיטגעהאלטן א לייוו הוקאפ פון די אסיפה.
