די תלמידי הישיבה וועלכע לעבן מיט די ערשטע זמן בין כותלי המתיבתא מיט גרויס הצלחה, האבן מיטגעהאלטן א שיינע שמחת השבע ברכות בהיכל הישיבה, צוגעשטעלט לכבודו פון כ"ק אדמו"ר מסאטמאר שליט"א נאך די חתונה פון א אייניקל, פאר לענגערע שעות האבן די בחורים זוכה געווען צו פארברענגען כשהמלך במסיבו און געניסן פון דעם רייכן פראגראם דורכאויס די שמחה.
די שבע ברכות איז געפראוועט געווארן פארלאפענעם דאנערשטאג שמות צומארגנס פון די שמחת החתונה, און עס זענען געלאדנט געווארן פילצאליגע אדמורי"ם ורבנים פון מאנסי, צווישן אנדערע האבן באשיינט די שמחה כ"ק האדמורי"ם מוויזניץ, סקולען, ראחמיסטריווקא פון מאנסי און ספרינג וואלי, בארניב, סטאניסלאוו, זידטשויב פרעמיסלא, און נאך פילע רבנים ודיינים. אזוי אויך האט זיך באטייליגט כ"ק אדמו"ר מפינסק קארלין שליט"א וועלכער איז געווען צוגאסט אין שטאט מאנסי לטובת מוסדותיו הקדושים.
אלס יושב ראש האט אויפגעטרעטן דער באקאנטער פה מפיק מרגליות הרב מאיר מרדכי בערקאוויטש הי"ו, כ"ק גאב"ד סאטמאר מאנסי שליט"א האט אויפגעטרעטן מיט פאסיגע דברי תורה וברכה, ארויסברענגענדיג לשבח פון די הייליגע מתיבתא וואו מען זיצט און לערנט מיט גרויס התמדה, און האט שוין אין דעם קורצן צייט זיך קונה שם געווען אלס א ריכטיגער מקום תורה.
דעם רבינ'ס זון הגה"צ ר' יעקב בער טייטלבוים שליט"א אבד"ק סיגעט וועלכער באגלייט די ישיבה כסדר, האט אויפגעטרעטן מיט א דרשה, שטייענדיג נאך א פארהער ווען די בחורים האבן זיך אויסגעצייכנט מיט ידיעות נפלאות אין די לימודים. איינער פון די תלמידים האבן אויפגעטרעטן מיט א דרשה, און א צווייטע בחור האט געזינגען גראמען. דורכאויס די סעודה האט דער רבי שליט"א מכבד געווען די רבנים המשתתפים צו טאנצן מיטן חתן און די מחותנים, און מיט די כיבודים ביים בענטשן האט דער רבי מכבד געווען רבנים ואנשים חשובים, כ"ק גאב"ד סאטמאר מאנסי שליט"א, הגה"צ ר' שלום גליק שליט"א ראש הישיבה, הגה"צ ר' מרדכי דוב בעק שליט"א אב"ד טאלמיטש, און די צוויי מחותנים כ"ק אדמו"ר מאלעסק שליט"א, און דעם רבינ'ס זון הגה"צ ר' יואל טייטלבוים שליט"א.
