א גאר הערליכע מעמד לכבודה של תורה איז פארגעקומען אינעם עיר ואם בישראל בארא פארק, ווען הונדערטער אידן האבן זיך פארזאמלט צו פייערן די דערגרייכנדע מאמענט, צום ערשיינונג פון די נייע ספר "להתהלך" אויף מגילת אסתר, אין די סעריע פון די וואונדערליכע ספרים אויף תנ"ך, וואס איז פארפאסט געווארן דורכן באקאנטן מרביץ תורה ומחבר ספרים, הרב הגאון רבי אורי האלצמאן שליט"א.
די ספרים להתהלך איז ברייט באקאנט ביי לומדי תורה וחובבי תורה, אידישע קינדער איבער די וועלט זענען זיך מחיה דערמיט כמים קרים על נפש עיפה, האבענדיג א געשמאקע פירוש באגלייט מיט פאסיגע געדאנקען אויף די פסוקי תנ"ך, וואס טוט שטארק פארגרינגערן דאס לערנען. דער מחבר הספרים פארט ארום איבער די וועלט צו געבן שיעורים, מתוקים מדבש ונופת צופים, להגדיל תורה ולהאדירה.
די ספר און די שיעורים פונעם גאון שליט"א ווערן געשטיצט און ערמעגליכט דורכן באקאנטן תורה אימפעריע "כרם בין תורה לחכמה", א מכון וואס שטעלט צו מערערע טיפע שיעורי תורה און שטיצט תלמידי חכמים, אנגעפירט דורך די צוויי חשובע צנתרי דדהבא, דער יששכר פונעם מכון, דער באקאנטער תלמיד חכם ומרביץ תורה הגאון רבי צבי יונתן מארטאן שליט"א, און זיין נאנטער ידיד ופטרון, דער זבולון פון די מכון דער באקאנטן אוהב ותומך תורה ולומדיה, חכם ונבון ונדיב לב, הרה"ח ר' יואל ווערצבערגער הי"ו, וואס באשיינט אלע שיעורים און איז מוסיף כבוד התורה בפעליו הכבירים. די מכון טוט גדולות ונצורות, איז מוסיף כבוד התורה, שמחת התורה און איז מרבה ספסלי ביהמ"ד ביי בעלי בתים, להגדיל תורה ולהאדירה.
די גולת הכותרת פון די מכון זענען די טעגליכע טיפע שיעורים אין גמרא בעיון רב וואס ווערט צוגעשטעלט דורכן כרם, פארגעלערנט דורכן ראש המכון הגאון המובהק רבי יונתן מארטאן שליט"א, וואס ציעט מערערע לומדים וואס שטייגן בתורה דורך די שיעורים עמוקים. אזוי אויך קומען פאר מערערע שיעורים בעיון אין ענינים פון השקפה און ספרי הראשונים דורך הגאון המופלא רבי יצחק לאווי שליט"א און נאך מערערע שיעורים און חיבורי תורה.
די מעמד מפואר צו מפאר זיין און מכבד זיין די הוצאה לאור פון א נייע ספר, איז געמאכט צו מוסיף זיין כבוד התורה, צו מכבד זיין א תלמיד חכם, ווי די מסורת פון חז"ל אז "עושים סעודה לגמרה של תורה". די סעודה און מעמד מפואר איז געווארן צוגעשטעלט דורכן מכון אין ביהמ"ד כתר ישראל אין בארא פארק, די אכסניה של התורה ווי עס קומען פאר מערערע פון די שיעורים בכל מקצועות התורה.
ביים מעמד האבן אנטייל גענומען הונדערטער אידן, מקשיבי השיעורים ומבקרי הכרם, און פארברענגט בדברי תורה, און הנאה געהאט פון א הערליכע סעודה לכבודה של תורה, סעודה שתלמידי חכמים מסובים בה, ביד רחבה.
דער בעל האכסניה, נשיא המוסד, דער מזכה הרבים ואיש תורה וחכמה הנדיב המפורסם ר' יואל ווערצבערגער הי"ו האט באגריסט די פארזאמעלטע און ברבים געדאנקט הקב"ה פאר די זכייה צו שטיין בראש המכון וואס איז מזכה דעם רבים מיט מערערע שיעורים ופעולות להרבצת התורה, און פארגעשטעלט פאר די נאספים די געדאנק אז ווען א תלמיד חכם איז זוכה צו האלזן זיין נייע גרויס פרי, זיין חיבור וואס ער האט אריינגעלייגט דערין אזויפיל כוחות, איז א צייט צו מאכן א סעודה לגמרה של תורה און אז אוהבי תורה זאלן זיך מיטפרייען און ארויסוויזן יקרא דאורייתא
דער נשיא המכון ר' יואל האט אויפגערופן די חשובע בעלי דרשנים, מרביצי תורה וחכמיה,
הרב הגאון ר' יונתן מארטין שליט"א, דער מגיד שיעור וואס לערנט פאר די טעגליכע שיעור גמרא בעיון מטעם המכון, הרב הגאון ר' יצחק לאווי שליט"א, ראש בית המדרש עיון למחשבה, דער מגיד שיעור וואס לערנט פאר מטעם המכון מערערע שיעורים בעיון אין ספרי ראשונים בעיקרי הדת, דער גאסט רעדנער הרה"ג ר' דוד פורמאן שליט"א באקאנטער מחבר ספרים ומרביץ תורה, הגאון ר' משה האבנער שליט"א רב פון די בית המדרש המפואר בית קל אין בארא פארק, הרב הגאון ר' שניאור בורטאן שליט"א מחבר ספרי משנת יעקב, און דער חתן המעמד, מחבר הספר הרב הגאון רבי אורי האלצמאן שליט"א
אלע שיעורים ודרשות האבן מוסיף געווען כבוד לתורה, גערעדט בשבח פון מחדש זיין חידושי תורה, באגריסט דעם חשובן מכון כרם תורה וחכמה, וואס הייבט אויף די חברי המכון און איז מוסיף אורה זו תורה אויף די וועלט, און ארויסגעברענגט די געוואלדיגע מתנה פאר די תורה וועלט מיט די ערשיינונג פונעם נייעם ספר.
תנו כבוד לתורה!
