די עולם התורה איז איינגעהילט אין טרויער מיט געפילן פון יתמות, הערנדיג די ביטערע בשורה פון די ענגלישע הויפטשטאט לאנדאן, אז דער זקן ראשי הישיבות הגאון הגדול רבי אליקים שלעזינגער זצ"ל ראש ישיבת הרמה, איז היינט נסתלק געווארן לגנזי מרומים, אין א זעלטענעם שיבה טובה פון הונדערט און פיר יאר, לדאבון לב אלופי אלפי ישראל בכל מקומות מושבותיהם.
די הסתלקות פונעם ראש ישיבה ברענגט אויף א אומגעהויערע ווייטאג ביי זיינע טויזענטער תלמידים, זיינע צענדליגע טויזענטער מעריצים ושומעי לקחו וואס האבן ארויפגעקוקט אויף דעם אדם הגדול בענקים, דער זקן ויושב בישיבה וואס האט משפיע געווען תורה ויראה איבער די גאנצע וועלט, פארשיינט די עולם התורה מיט זיין גדלות ועמקות בתורה, און משמיע געווען דעם דבר ה' ברמה אין יעדן געלעגנהייט צו שטיין פעלזן פעסט קעגן די נסיונות הדור.
דער ראש ישיבה הגאון ר' אליקים זצ"ל איז געבוירן געווארן אין יאר תרפ"ב, צו זיין פאטער הרב ר' דוד שלעזינגער זצ"ל, נאך איידער זיין בר מצוה איז ער אריין לערנען אין די בארימטע ישיבה אין פרעשבורג ביי הגה"ק בעל דעת סופר זת"ל, און שפעטער האט ער געלערנט אין די נייטרא ישיבה. ווען ער איז עלטער געווארן האט ער געלערנט אין די בארימטע ישיבות אין ארץ ישראל, ביי הגה"ק מהרי"ץ דושינסקיא זי"ע, און אין די פאנאוויטשע ישיבה וואו ער האט געלערנט אלס חתן.
בהגיעו לפירקו איז ער געווארן אן איידעם ביי הרב הגאון ר' משה בלוי ז"ל פון די באקאנטע עסקנים פאר די יהדות החרדית אין ארץ ישראל, אין די שפעטערע יארן האט ער זיך געצויגן קיין אייראפע מיטן הסכמה פונעם בריסקער רב זצ"ל, ער האט געדינט אלס ראש ישיבה אין שטאט קאפלאן אין בעלגיע פאר צוויי יאר, און דערנאך האט ער זיך געצויגן קיין לאנדאן וואו ער האט געגרינדעט זיין ישיבה "ישיבה הרמה", וואו ער האט אויך אוועקגעשטעלט א כולל פאר אינגעלייט.
דער ראש ישיבה זצ"ל האט מרביץ תורה געווען צענדליגע יארן נאכאנאנד, זיין גאנצע לעבן איז געווען איין שטיק הרבצת התורה צו משפיע זיין פאר תלמידים, ער האט זיך געהאלטן נאנט מיט די גדולי הדור און געווען א גודר גדר ועומד בפרץ. גאר אסאך האט ער געטון צו ראטעווען דעם חינוך הטהור אין ענגלאנד, און אזוי אויך אין אנדערע לענדער, ער האט זוכה געווען אויפצושטעלן א הערליכע דור פון חשובע קינדער און אייניקלעך, תלמידי חכמים, מרביצי תורה, מגידי שיעור און ראשי ישיבות, וואס זענען ממשיך זיינע הייליגע דרכים בעוז ובגבורה.
ליידער איז די לעצטע יאר צייט געווען א בחינה פון ספר תורה שרוי בצער, ווען דער ראש ישיבה איז געווען אין א שוואכן געזונט צושטאנד, איבערהויפט אין די לעצטע פאר טעג ווען די מצב האט זיך שטארק פארערגערט. טראץ זיין הויכן עלטער און שוואכע כוחות איז ער אבער אנגעגאנגען בצלילות הדעת ביזן לעצטן טאג, און נאך דעם לעצטן שלש סעודות אויפגעטרעטן מיט א שמועס פאר זיינע תלמידים.
די מסע הלוויה וועט פארקומען היינט זיבן אזייגער פארנאכטס אויף די לאנדאנע זייגער, בהיכל ישיבתו הרמה אויף די פעירהאלט גאס אין לאנדאן, און ער וועט געברענגט ווערן למנוחת עולמים אויפן ענפיעלד בית החיים אין לאנדאן.
וכל בית ישראל יבכו את השריפה אשר שרף ה'.
