איבערראשנדע נייעס ווערט געמאלדן די טעג בחצר הקודש סקווירא, אז די היסטארישע ירושה ספר תורה פון הרה"ק רבי אהרן מטשערנאביל זי"ע וואס איז שוין מקודש ביי דורי דורות, און כ"ק אדמו"ר מסקווירא שליט"א זעלבסט האט שוין אינוועסטירט דערין גאר אסאך עס צו פארשענערן בהידור רב, וועט אצינד געגעבן ווערן במתנה פאר כ"ק אדמו"ר מסקווירא שליט"א.
די היסטארישע ספר תורה ציהט היסטאריע פון העכער הונדערט און פופציג יאר, ווען עס האט באלאנגט פאר הרה"ק רבי אהרן מטשערנאביל זי"ע, דער עלטסטער פון די אכט הייליגע זיהן פונעם הייליגן טשערנאבילער מגיד זי"ע, וואס האט ווייטער געפירט דעם שיינעם הויף אין שטאט טשערנאביל.
נאכן הסתלקות פון הרה"ק רבי אהרן מטשערנאביל זי"ע איז די ספר תורה אריבער צו זיין זון הרה"ק רבי ישעי' משולם זוסיא מטשערנאביל זצ"ל, און דערנאך צו זיין זון הרה"ק רבי שלמה בנציון מטשערנאביל זצ"ל, וועלכער האט דאס מיטגענומען מיט זיך ווען ער איז אנטלאפן פון טשערנאביל ביי די שרעקליכע פאגראמען אין רוסלאנד אין יאר תרע"ט.
מיט עטליכע יאר צוריק איז די ספר תורה אנגעקומען צום באקאנטן טשערנאבילער אייניקל הרב יצחק מאיר טווערסקי שליט"א פון קווינס, וועלכער איז עוסק צו פאראייביגן די הייליגע צדיקים לבית טשערנאביל, ער האט זיך דערוואוסט פון א טשערנאבילער אייניקל וואס וואוינט אין ארץ ישראל, אן אייניקל פון הרה"ק רבי שלמה בנציון מטשערנאביל זצ"ל, און זייענדיג ביי אים אויף א באזוך האט ער געזעהן דעם היסטארישן ספר תורה פארפאקט אין א זעקל, וואס דער אייגענטומער האט עס פארגעשטעלט אלס א תנ"ך פונעם הייליגן בעל שם טוב זי"ע.
נאכן נאכגיין די פרטים ביזן סוף איז באשטעטיגט געווארן אז עס האנדלט זיך פון די היסטארישע ספר תורה פון הרה"ק רבי אהרן מטשערנאביל זי"ע, ר' יצחק מאיר האט עס דאן אפגעקויפט, און כ"ק אדמו"ר מסקווירא שליט"א האט געצאלט צענדליגע טויזענטער דאללארן עס צו פאררעכטן ביי א סופר מומחה.
די ספר תורה איז גאר קליין, די פארמעט איז פיר אינטשעס גרויס, און די ווערטער זענען געשריבן אויף זייער א קליינע פארמאט, די לעצטע פאר יאר איז עס געלעגן ביי ר' יצחק מאיר טווערסקי אין קווינס, און עטליכע מאל האט ער עס געברענגט צו כ"ק אדמו"ר מסקווירא שליט"א צו ליינען און טאנצן דערמיט.
אצינד ווען מען גרייט זיך בחצר הקודש סקווירא צו א היסטארישע חגיגה, ווען מען ענדיגט ליינען די גאנצע תורה אינעם הייליגן קדשינו ספר תורה וואס איז אריינגעגעבן געווארן פארגאנגענע יאר ברוב פאר והדר במקהלות אלפי חסידים, און קומענדיגן מוצאי שבת שקלים וועט פארקומען א גרויסע מעמד הודאה וכינוס חזק אין ביהמ"ד הגדול, איז די היסטארישע ספר תורה געווארן אפגעקויפט דורך הנדיב הנכבד ר' נחום זלמן רוקח הי"ו, עס צו שענקן במתנה פאר כ"ק אדמו"ר מסקווירא שליט"א וועלכער ציהט זיין הייליגן יחוס צו הרה"ק רבי אהרן מטשערנאביל זי"ע.
די ספר תורה וועט געגעבן ווערן פארן רבי'ן ביים גרויסן מעמד מוצאי שבת שקלים, ווען דער רבי וועט דערביי אפרעכטן ריקודין קדישין לכבוד התורה.
