מיט גרויס צער ווערט אויפגענומען די ביטערע בשורה איבער די פטירה פון כ"ק אדמו"ר מאסטראוו קאלושין זכר צדיק לברכה, מזקני האדמורי"ם בדורינו וועלכער האט משפיע געווען אויפן דור, פון זיין לעכטיגע ווינקל אין סידערהויסט קווינס רבות בשנים, און אויפגעלאכטן אידישע הערצער צו תורה און מעשים טובים.
דער אסטראוו קאלושינער רבי כ"ק הרה"צ רבי דוד שפיגל זצ"ל איז געווען א זון פון כ"ק אדמו"ר רבי פנחס אליהו שפיגל זצ"ל מאסטראוו קאלושין, וועלכער האט משפיע געווען אויפן אמעריקאנער אידנטום צענדליגע יארן, אויפן וועג פון זיינע עלטערן און זיידעס די פריערדיגע צדיקים וקדושים תלמידי בעל שם טוב הק' ותלמידי תלמידיו.
כ"ב אייר תרצ"ו איז דער רבי געבוירן געווארן דאהי אין אמעריקע, ווען זיין טאטע האט מכהן געווען באדמורו"ת אין די בראנקס, און געפירט א חסידישע הויף ווי אין די פארצייטישע היים אין אייראפע. בהגיעו לפירקו איז דער רבי געווארן אויסגעקליבן אלס איידעם ביים פיטסבורגער רבי כ"ק אדמו"ר רבי אברהם אבא זצ"ל בעל אמונת אברהם, אן אייניקל פון די פריערדיגע צדיקים לבית נדבורנא ולמעלה בקודש.
צענדליגע יארן האט דער רבי זצ"ל געפירט זיין שיינעם הויף אין סידערהויסט פון וואו ער האט פארשיינט תורה וחסידות אויפן גאנצן ארום, און זוכה געווען צו מקרב זיין אידישע קינדערלעך תחת כנפי השכינה.
די לעצטערע חדשים איז דער רבי געלעגן על ערש דוי אין א שווערן געזונט צושטאנד, און איז היינט אינדערפרי נפטר געווארן בשיבה טובה אין עלטער פון ניין און אכציג יאר, איבערלאזנדיג א הערליכע דור חשובע קינדער און אייניקלעך, תלמידי חכמים ומורי הוראה און מרביצי תורה, דארונטער חשובע רבנים ואדמורי"ם און ראשי ישיבות, ווען צווישן די אייניקלעך ציילט זיך כ"ק אדמו"ר מסאדיגורא שליט"א.
דער רבי זצ"ל לאזט איבער צוויי זיהן, הגה"צ ר' נפתלי ארי' שפיגל שליט"א אבד"ק אסטראוו קאלושין ירושלים, איידעם ביי כ"ק אדמו"ר מטאלנא שליט"א, און הגה"צ ר' יוסף שפיגל שליט"א רב הצעיר אין ביהמ"ד אסטראוו קאלושין אין סידערהויסט. די איידימער זענען ווי פאלגענד: הגה"צ ר' אשר חיים שטערנבוך שליט"א רב ביהמ"ד אהל יעקב אנטווערפן, כ"ק אדמו"ר מבאסטאן ב"פ שליט"א, הגה"צ ר' אפרים זלמן שטיינווארצל זצ"ל, הגה"צ ר' שמואל ברוך בראנדוויין שליט"א, הגה"צ ר' משה האלפערין שליט"א בן כ"ק אדמו"ר מוואסלוי שליט"א, הגה"צ ר' נפתלי צבי ווייטץ שליט"א אבד"ק אשי ישראל אין וואודמיר, הגה"צ ר' יוסף דוד ניישלאס זצ"ל אבד"ק אגודת אחים אין לעיקוואד, הגה"צ ר' יצחק הערשקאוויטש שליט"א, הגה"צ ר' יהודה אלכסנדר גליק שליט"א רב דקהל חסידים אין לאורענס, און הגה"צ המשפיע ר' אהרן וויינבערג שליט"א.
די מסע הלוויה קומט פאר יעצט ערב שבת קודש צען דרייסיג פארמיטאג, בבית מדרשו אין סידערהויסט, אויפן וועג צום בית החיים בית ישראל אין ניו דזשערזי וואו ער וועט קומען לקבורה בחלקת אבותיו הקדושים.
זכר צדיק לברכה לחיי העולם הבא.
