היינט ווערט באקאנט ביי תלמידי וחסידי סאטמאר, אז הרבנית הצדיקת מסאטמאר תליט"א, מחברתו הטהורה פון כ"ק אדמו"ר מסאטמאר שליט"א, האט אפגעקויפט דעם זכות שם ההיכל פון די נייע בנין הישיבה "דרך התורה" ד'סאטמאר, לשמו ולזכרו פון איר גרויסן פאטער כ"ק אדמו"ר הרה"ק בעל ישועות משה מוויזניץ זצ"ל, שטייענדיג אצינד אין טאג פון די הילולא קדישא.
היינט נאכמיטאג איז פארגעקומען א ספעציעלע יארצייט סעודה בביתו נאוה קודש פונעם סאטמארער רבי'ן שליט"א אין קרית יואל, וואו עס האבן זיך פארזאמלט די בני משפחת המלוכה אין שפיץ פונעם רבי'ן, ביומא דהילולא קדישא פונעם חותן המלך כ"ק אדמו"ר הרה"ק בעל ישועות משה מוויזניץ זצ"ל. דורכאויס די יארצייט סעודה האט אויפגעטרעטן דעם רבינ'ס עלטסטע זון הגה"צ אבד"ק סאטמאר וויליאמסבורג שליט"א, וועלכער האט מבשר צדק געווען די פרייליכע בשורה איבער די נייע נאמען וואס וועט געגעבן ווערן בין כותלי הישיבה לזכרו הטהור פונעם זיידן דער בעל ההילולא.
די רעדע איז פון די נייע בנין הישיבה וואס איז געבויעט געווארן אין קרית יואל המורחבת, און איז דעזיגנירט אלס אכסניא של תורה פון ישיבה קטנה סניף דרך התורה, וואס ווערט פערזענליך באגלייט דורכ'ן סאטמאר וומס"ב רב שליט"א, אצינד איז באשטימט געווארן אז די היכל ביהמ"ד וועט באקומען דעם נאמען "היכל ישועות משה", נאך וואס די סאטמארער רעבעצין תליט"א האט אפגעקויפט דעם זכות שם ההיכל, לשמו ולזכרו פון איר גרויסן פאטער דער וויזניצער רבי זצ"ל.
