טויזענטער תלמידי וחסידי סאטמאר האבן זוכה געווען מיטצולעבן היסטארישע מעמדי הוד בצל הקודש פון כ"ק אדמו"ר מסאטמאר שליט"א, וועלכער האט אין א מזל'דיגע שעה אריינגעגעבן א מהודר'דיגע ספר תורה במקהלות אלפי חסידים, ביים גרויסן הכנסת ספר תורה וואס איז פארגעקומען דעם דינסטאג ביום ל"ג בעומר צום ביהמ"ד הגדול דקהל יטב לב ד'סאטמאר אין וויליאמסבורג.
די גייסטרייכע קייט פון מעמדי קודש האט זיך אנגעהויבן דעם מאנטאג נאכט בליל ל"ג בעומר, ביים גרויסארטיגן מעמד סיום כתיבת האותיות וואס איז פארגעקומען אין די גיגאנטישע דאגגעל גרינהאוז קאמפלעקס אין די ברוקלין נעווי יארד אין וויליאמסבורג, קאמבאנירט מיטן שולחן הטהור לכבוד ל"ג בעומר, און די יערליכע דינער לטובת מוסדות יטב לב אין ירושלים עיה"ק.
מאנטאג נאכמיטאג ערב ל"ג בעומר איידער די גרויסע מעמד סיום כתיבת האותיות במקהלות רבבות אלפי ישראל, איז פארגעקומען א באשיידענע מעמד כתיבת האותיות בביתו נאוה קודש פונעם רבי'ן, וואו עס האבן זיך באטייליגט פילע אדמורי"ם ורבנים ואנשי שם, כ"ק האדמורי"ם מפאפא, וויען, וויזניץ פון וומס"ב, דינוב, קאשוי, סקולען פון וומס"ב, ישועת יעקב סקולען, תולדות צבי ספינקא, צעהלים, קיוויאשד, גאלאנטא, גאב"ד סאטמאר מאנסי, גאב"ד יאוואזשנא, גאב"ד פריימאן, אבד"ק זענטא, רבני ודייני קהילות סאטמאר און נאך פיל.
אין די פריע נאכט שעה'ן האבן טויזענטער חסידים שוין איבערגעפולט די גיגאנטישע דאגגעל גרינהאוז זאל מקצה אל קצה, דער רבי שליט"א איז אריינגעקומען מלובש בבגדי שבת לכבוד די גרויסע שמחה, אזוי אויך זענען געגאנגען מיט בגדי שבת די בני משפחת המלוכה און די נאנטע משמשים בקודש.
אין די צייט וואס די עסקני הקהילה זענען געווען פארנומען צו פלאצירן דעם ריזן ציבור ביי די טישן אין צענטער פון זאל און אויף די הויכשטאקיגע פארענטשעס, זענען פילע אידן חסידים ואנשי מעשה געווען געצווינגען צו מיטהאלטן פונדרויסן צוליב דעם ריבוי העם, נאך פייערליכע ריקודין און ניגוני התעוררות האט אויפגעטרעטן הרה"ג ר' ליפא פעקעטע שליט"א מגיד שיעור אין חבורת הלימוד "זכרו", און דערנאך האט דער רבי שליט"א אריינגעשריבן די לעצטע אותיות אינעם מהודר'דיגן ספר תורה, ווען דער גאנצער ציבור איז איינגעהילט אין פייערליכע ריקודין לכבודה של תורה.
דער רבי האט געמאכט הגבה און אנגעהויבן טאנצן מיט גרויס התרגשות, אינמיטן טאנצן האט דער רבי געזאגט די ברכה פון שהחיינו, און ווייטער ממשיך געווען די פרייליכע ריקודין א שטיק צייט. דאן האט מען גולל געגווען די ספר תורה און ממשיך געווען מיטן סעודת הילולא לכבוד התנא האלקי רבי שמעון בר יוחאי.
דער מנהל פון מוסדות יטב לב הרב ירמי' טייטלבוים שליט"א האט אויפגעטרעטן מיט א דרשה, און דערנאך האט דער רבי שליט"א אויפגעטרעטן מיט דברות קודש. דערנאך האט דער רבי אנגעצינדן פינף גרויסע ליכט ווען דער גאנצער ציבור הייבט זיך אין לעבעדיגע ריקודין לכבוד התנא האלקי רבי שמעון בר יוחאי.
דערנאך האט מען אויסגעליידיגט דעם גאנצן חלל פון די זאל און דער ציבור חסידים האט געטאנצן לעבעדיג פאר לענגערע שעות, ווען אין די זעלבע צייט טוען טויזענטער חסידים זיך איינהאנדלען די נארוואס ערשינענע ספר "קול יהודה", מדברות קדשו וחידושי תורה פונעם רבי'ן שליט"א, וואס איז ספעציעל ערשינען לכבוד די גרויסע חגיגת הכנסת ספר תורה.
די ווייטערדיגע באריכט איבער די מעמד התהלוכה ברחובה של עיר וויליאמסבורג, און די פרייליכע ריקודין אין ביהמ"ד הגדול, וועט בעז"ה נאכפאלגן אינאיינעם מיט די שפעטערדיגע בילדער.
