שטייענדיג ווייניגער ווי צוויי וואכן בעפאר יו"ט שבועות, איז אונטערגענומען געווארן א גרעסערע פראיעקט בחצר הקודש סאטמאר צוצולייגן נאך הונדערטער זיץ פלעצער צום גרויסן ביהמ"ד אין קרית יואל, צו קענען אקאמאדירן די טויזענטער חסידים וואס קומען זיך מסתופף זיין בצל הקודש פון כ"ק אדמו"ר מסאטמאר שליט"א אויף יו"ט שבועות קבלת התורה.
דאס יאר האט די הנהלת הקהילה אונטערגענומען רענאוואציע ארבעט אריינצונעמען די גאנצע טעראסע פון די ביהמ"ד אויף מערב זייט, אלס א פולשטענדיגע טייל פונעם היכל בית המדרש, אין די פארלאפענע טעג האט מען אנגעהויבן צו אראפנעמען די מערב וואנט פון ביהמ"ד, און מען האט געבויעט א נייע וואנט הארט ביים ענדע פון די טעראסע, און אזוי ברענגט מען אריין די גאנצע טעראסע אלס א פולשטענדיגע טייל פונעם גרויסן היכל.
