אין די יעצטיגע טעג ווען תלמידי וחסידי סאטמאר האלטן מיט די פארשריט מיטן גרינדונג פון א נייע סאטמארער ישוב אין מאנטיסעלא, איז געמאלדן געווארן די נייעס אז כ"ק אדמו"ר מסאטמאר שליט"א האט קורא שם געווען פאר די נייע ישוב "קרית משה", לשמו ולזכרו פון זיין גרויסן פאטער כ"ק אדמו"ר הרה"ק בעל ברך משה מסאטמאר זצ"ל.
די נייע ישוב פאר חסידי סאטמאר אין מאנטיסעלא ווערט געבויעט הארט נעבן די באקאנטע "איחוד קאנטרי" קרית ויואל משה, וואס איז א צענטער פונקט פאר די גאנצע אומגעגנט דורכאויס די זוממער וואכן, און פארמאגט הונדערטער באנגעלאוס און בניני מוסדות התורה מיט אלע באדערפענישן. הארט דערנעבן ווערט אצינד אויפגעבויעט א שפאגל נייע ישוב מיט הונדערטער דירות, און די בניני המוסדות אין די איחוד קאנטרי וועלן דינען אלס אכסניא של תורה ותפילה פאר די תלמוד תורה און מיידל שולע וואס וועט נתייסד ווערן בקרוב אינעם נייעם ישוב.
דעם זונטאג איז פארגעקומען אן אסיפה בביתו נאוה קודש פון כ"ק אדמו"ר מסאטמאר שליט"א, וואו די עסקני הישוב זענען איבערגעגאנגען מיטן רבי'ן די לעצטע פלענער און די פאקטישע אנטוויקלונג אויפן שטח, דערביי האט דער רבי געמאלדן אז די נייע ישוב וועט טראגן דעם נאמען "קרית משה" על שם אביו הגדול הרה"ק בעל ברך משה מסאטמאר זצ"ל.
אזוי אויך האט כ"ק אדמו"ר מסאטמאר שליט"א אויפגענומען הגה"צ ר' שלום טייטלבוים שליט"א צו דינען אלס דומ"ץ הקריה, דער דיין וועלכער איז ממלא מקום אביו הגה"צ ר' לייבוש טייטלבוים זצ"ל אלס דיין אין די איחוד קאנטרי דורכאויס די זוממער חדשים, וועט זיך בעז"ה אריבערציען צו די נייע ישוב "קרית משה" און שטיין צוהילף פאר די תושבי השכונה ברוחניות ובגשמיות.
