היינט מאנטאג איז נפטר געווארן בשיבה טובה הרב הגאון רבי שמואל יוסף פישביין זצ"ל, וועלכער האט צענדליגע יארן משמש געווען ברבנות אין ווייט לעיק, און איז געווען שטארק באקאנט ביי פילע אידן זייענדיג פון די חשובע רבנים אין די קעטסקילס.
הרב פישביין איז געבוירן געווארן אין שיקאגא, וואו ער האט באקומען א מסירת נפש'דיגע חינוך פון זיינע חשובע עלטערן, געשטאמט האט ער פון טשערנאבילער חסידים, און אלס קליין קינד איז ער פאריתומ'ט געווארן פון זיין טאטן.
אין זיינע יונגע יארן האט ער געלערנט אין ישיבת תורה ודעת, און שפעטער אין די טעלזער ישיבה. אלס אינגערמאן האט ער שוין אנגעהויבן פארלערנען שיעורים פאר תלמידים, און מיט פינף און פופציג יאר צוריק איז ער געווארן אויפגענומען אלס רב אין די לאקאלע שוהל אין הארליוויל. דורכאויס די יארן איז ער געווען פון די באקאנטע רבנים אין די קאנטרי בערג, און אסאך אויפגעטון פאר אידישקייט אין יענע געגנטער.
ליידער איז ער נישט געזונט געווען די לעצטערע יארן, און ער האט זיך אויפגעהאלטן אין לעיקוואד. די לוויה וועט פארקומען מארגן דינסטאג אין מאנסי.
שנשמע ונתבשר בשורות טובות.
