מאנטאג בהעלותך 6:45 נאכמיטאג
מען האט נארוואס געענדיגט די קבורה און קדיש, דער ציבור האלפים שטעלן זיך אויף די שורות צו מנחם זיין די אבלים כ"ק האדמורי"ם מסקווירא און ראחמיסטריווקא שליט"א.
----
מאנטאג בהעלותך 6:22 נאכמיטאג
אין די יעצטיגע מינוטן האט מען פארענדיגט די הקפות, און מען האט אנגעהויבן מיט די קבורה.
----
מאנטאג בהעלותך 6:15 נאכמיטאג
הרה"ג ר' יצחק צבי סופר שליט"א מרבני ק"ק ראחמיסטריווקא האט פארגעזאגט צידוק הדין, די קינדער כ"ק האדמורי"ם מראחמיסטריווקא שליט"א און דער ברודער כ"ק אדמו"ר מסקווירא שליט"א האבן געריסן קריעה כדת וכדין, אצינד רעכט מען אפ די הקפות כנהוג.
-----
מאנטאג בהעלותך 6:00 נאכמיטאג
די מיטה איז נארוואס אנגעקומען צום בית החיים הר שלום, און מען גייט אצינד אנהייבן מיט די הקפות און קריעה כנהוג.
מאנטאג בהעלותך 5:50 נאכמיטאג
אויפן בית החיים הר שלום אין עירמאונט, ווארטן שוין אפ די מיטה טויזענטער אידן חסידים ואנשי מעשה, ובראשם כ"ק אדמו"ר מסקווירא שליט"א, כ"ק האדמורי"ם מוויזניץ שליט"א פון מאנסי און קייאמישא, און כ"ק אדמו"ר מסקווירא מב"פ שליט"א.
מאנטאג בהעלותך 5:40 נאכמיטאג
מען האט נארוואס געענדיגט באגלייטן אויף סעדל ריווער ביז די רוט 59, א פלאטע פון באסעס פירן דעם ציבור צום בית החיים הר שלום אין עירמאונט.
מאנטאג בהעלותך 5:29 נאכמיטאג
הונדערטער אידן באגלייטן די מיטה אויף וועסט מעיפל אין מאנסי.
מאנטאג בהעלותך 5:20 נאכמיטאג
אויפן בית החיים הר שלום אין עירמאונט פארזאמלען זיך שוין פילצאליגע אידן חסידים ואנשי מעשה, אפצוגעבן דעם כבוד האחרון פארן הויכגעשעצטע רעבעצין ע"ה.
די ראמאפא פאליציי מיט לאקאלע אידישע ארגענעזאציעס זענען אקטיוו מיט די צוגרייטונגען און זיכערהייט מוסנאמען.
מאנטאג בהעלותך 5:12 נאכמיטאג
אין די פריערדיגע מינוטן איז די מיטה אנגעקומען פארנט פון ראחמיסטריווקא ביהמ"ד אויף האופעל לעין, הרה"ג ר' יהושע העשיל הערשבערג שליט"א מרבני הקהילה האט פארגעזאגט קל מלא רחמים, און אצינד באגלייט מען אויף בלאוועלט ראוד, אין ריכטונג פון וועסט מעיפל צו סעדל ריווער.
צווישן אנדערע האבן זיך אנגעזעהן די קינדער האדמורי"ם מראחמיסטריווקא שליט"א, כ"ק אדמו"ר מסקווירא שליט"א, דער פלומעניק כ"ק אדמו"ר מוויזניץ שליט"א פון מאנסי, און נאך פילע רבנים.
מאנטאג בהעלותך 4:50 נאכמיטאג
ביי די לוויה פארנט פון ביהמ"ד הגדול אין שיכון סקווירא, האט הגה"צ ר' יוסף ישראל אייזענבערגער שליט"א דומ"ץ שיכון סקווירא געזאגט די קל מלא רחמים כנהוג, דערנאך האט מען אנגעהויבן באגלייטן ארויף די דזשעקסאן גאס אויפן וועג ארויס פון שטעטל.
די מיטה איז יעצט אויפן וועג קיין מאנסי צו ראחמיסטריווקא ביהמ"ד אויף האופעל לעין, כ"ק אדמו"ר מסקווירא שליט"א באגלייט מיט די קאר און וועט זיך אויך באטייליגן ביים לוויה פארנט פון ראחמיסטריווקא ביהמ"ד.
מאנטאג בהעלותך 4:40 נאכמיטאג
די מיטה ווערט ארויסגעברענגט אצינד מביתו נאוה קודש פון כ"ק אדמו"ר מסקווירא שליט"א, דער סקווירא רבי און די קינדער האדמורי"ם שליט"א און נאך פילע רבנים, חסידים ואנשי מעשה, זענען פארזאמלט ארום אפצוגעבן דעם כבוד האחרון.
מאנטאג בהעלותך 4:30 נאכמיטאג
טויזענטער חסידי סקווירא פארזאמלט פארנט פון ביהמ"ד הגדול אין שיכון סקווירא, לחלוק כבוד האחרון פארן הויכגעשעצטע ראחמיסטריווקא רעבעצין ע"ה, ברתא דמלכא פון כ"ק אדמו"ר הרה"ק מסקווירא זצ"ל.
-----
מאנטאג בהעלותך 4:25 נאכמיטאג
די טאכטער הרבנית תליט"א אשת הגה"צ ר' מרדכי טווערסקי שליט"א בנו הגדול פון כ"ק אדמו"ר מטשערנאביל שליט"א, איז נארוואס אנגעקומען פון ארץ ישראל, דירעקט פון לופטפעלד מיט פאליצייאישע באגלייטונג, לביתו נאוה קודש פון כ"ק אדמו"ר מסקווירא שליט"א, וואו די בני המשפחה זענען שוין פארזאמלט זיך צו געזעגענען פון די חשובע רעבעצין ע"ה.
מאנטאג בעלותך 4:10 נאכמיטאג
בביתו נאוה קודש פון כ"ק אדמו"ר מסקווירא שליט"א געפונען זיך פארזאמלט אצינד די בני המשפחה זיך צו געזעגענען, דער איינציגער ברודער כ"ק אדמו"ר מסקווירא שליט"א, די זעקס זיהן כ"ק האדמורי"ם מראחמיסטריווקא שליט"א, און די איידימער כ"ק אדמו"ר מוויזניץ שליט"א פון קייאמישא, און כ"ק אדמו"ר מבארניב שליט"א.
----
מאנטאג בהעלותך 4:00 נאכמיטאג
די מיטה קומט יעצט אן קיין שיכון סקווירא, כ"ק אדמו"ר מסקווירא שליט"א וועט זיך אצינד געזעגענען פון זיין לעצט פארבליבענעם שוועסטער די רעבעצין ע"ה, אין די גאראדזש צימער בביתו נאוה קודש.
-----
מאנטאג בהעלותך 3:45 נאכמיטאג
העפטיגע צוגרייטונגען אויפן בית החיים הר שלום אין מאנסי
זמני ניחום אבלים ביי כ"ק אדמו"ר מסקווירא שליט"א.
היינט נאכט נאך די לוויה אין מאנסי, וועלן די קינדער כ"ק האדמורי"ם מראחמיסטריווקא שליט"א זיצן שבעה אין ביהמ"ד הגדול אין שיכון סקווירא, אינאיינעם מיטן פעטער כ"ק אדמו"ר מסקווירא שליט"א.
מאנטאג בהעלותך 2:30 נאכמיטאג
העפטיגע צוגרייטונגען אויפן בית החיים הר שלום אין מאנסי.
-----
מאנטאג בהעלותך 2:00 נאכמיטאג
נאכן ענדיגן באגלייטן אויף די עלפטע עוועניו, איז די מיטה ארויסגעפארן אויפן וועג קיין שיכון סקווירא, וואו די לוויה וועט פארקומען פארנט פון ביהמ"ד הגדול אין שיכון סקווירא.
ביים מסע הלוויה אין בארא פארק האבן זיך באטייליגט צווישן אנדערע כ"ק האדמורי"ם מבאבוב 45, טשערנאביל, וויזניץ פון וומס"ב, ירושלים, און ב"פ, סקווירא מב"פ, ביקסאד, קאסאני, פאלטישאן, פאלטישאן בענסענהוירסט, בלאזוב ריבאטיטש, לויעוו טשערנאביל, בריזדוביץ, קאלאמייא, לעסק, גאב"ד טענקא, אבד"ק באבוב 45, אבד"ק פאפא ב"פ, אבד"ק נעפלעמיץ, אבד"ק היבנוב, אבד"ק אלכסנדר, גאב"ד פאלטישאן, אבד"ק ראדאמישלא ביתר און נאך.
-----
מאנטאג בהעלותך 1:53 נאכמיטאג
נאך וואס די מיטה איז אנגעקומען פארנט פון ביהמ"ד הגדול ראחמיסטריווקא, האט דער לעגענדארער משמש בקודש בחצר הקודש ראחמיסטריווקא הרב החסיד ר' יהושע חיים קאסטען הי"ו פארגעזאגט די קל מלא רחמים כנהוג. אצינד הייבט מען אן באגלייטן די מיטה אראפ די פינף און פערציגסטע סטריט ביז ניו יוטרעקט, און פון דארט אויף די עלפטע עוועניו ביז די פופציגסטע סטריט.
צווישן אנדערע זעהן זיך אן אויפן פלאץ כ"ק אדמו"ר מבאבוב 45 שליט"א א מחותן, און כ"ק אדמו"ר מסקווירא מב"פ שליט"א א פלומעניק.
-----
מאנטאג בהעלותך 1:40 נאכמיטאג
מען האט יעצט ארויסגעברענגט די מיטה פון שטוב, און עס ווערט געפירט אצינד אראפ די גאס פארנט פון ביהמ"ד הגדול ראחמיסטריווקא אין בארא פארק.
מאנטאג בהעלותך 1:30 נאכמיטאג
כ"ק אדמו"ר מוויזניץ שליט"א פון ירושלים ביים אנקומען זיך משתתף זיין ביי די מסע הלוויה פון די מומע הרבנית ע"ה
-------
מאנטאג בהעלותך 1:10 נאכמיטאג
די מיטה ביים אנקומען אין שטוב פון די רעבעצין ע"ה, ביתו נאוה קודש פון הרה"ק מראחמיסטריווקא זצ"ל אויף די פינף און פערציגסטע סטריט.
מאנטאג בהעלותך 12:45 מיטאג
תושבי בארא פארק ווערן אינפארמירט דורך קאר הויכהילכערס, איבער די גרויסע לוויה.
-------
מאנטאג בהעלותך 12:30 מיטאג
פרטי וסדר הלוויה אין בארא פארק:
די מיטה פון די חשובע רעבעצין ע"ה ווערט אצינד ארייגעברענגט אין איר שטוב אויף די פינף און פערציגסטע סטריט אין בארא פארק, ביתו נאוה קודש פון כ"ק אדמו"ר הרה"ק מראחמיסטריווקא זצ"ל.
ארום 1:45 וועט די מיטה ווערן אריבערגעברענגט צום רחבת ביהמ"ד הגדול ראחמיסטריווקא א בלאק אראפציר, נאך קל מלא רחמים וועט מען באגלייטן די מיטה אראפ די פינף און פערציגסטע סטריט ביז די עלפטע עוועניו, און דערנאך וועט מען באגלייטן אויף די עלפטע עוועניו ביז די פופציגסטע סטריט.
יעצט מיטאג האט די יארק סיטי פאליציי אפגעשלאסן עטליכע גאסן ארום די ראחמיסטריווקא ביהמ"ד, די פינף און פערציגסטע סטריט פון די דרייצנטע עוועניו ביז פארט העמילטאן, און די צוועלפטע עוועניו פון פיר און פערציג ביז די זעקס און פערציגסטע סטריט.
די מיידלעך פון בית חינוך לבנות בית שפרה ד'ראחמיסטריווקא, וועלן ארויסקומען צו די לוויה ברחובה של עיר אפצוגעבן דעם כבוד האחרון. אזוי אויך בהוראת הקודש פון כ"ק אדמו"ר מסקווירא שליט"א וועלן די מיידלעך פון די בית צפורה הויך שולע אין בארא פארק, ארויסקומען צו די מסע הלוויה ברחובות העיר בארא פארק, אפצוגעבן דעם פאסיגן כבוד פאר די חשובע רעבעצין ע"ה טאכטער פון הרה"ק מסקווירא זי"ע. אזוי אויך די מיידלעך פון בנות מרגליא הויך שולע אין בארא פארק וועלן ארויסגיין צו די לוויה אפגעבן דעם כבוד האחרון, בהוראת הקודש פון כ"ק אדמו"ר מוויזניץ שליט"א פון בארא פארק, א דריפלטער פלומעניק פון די חשובע רעבעצין ע"ה.
די טאכטער הרבנית תליט"א אשת הגה"צ ר' מרדכי טווערסקי שליט"א בנו הגדול פון כ"ק אדמו"ר מטשערנאביל שליט"א, איז ערווארטעט צו לאנדן אין ניו יארק 3:30 נאכמיטאג, און וועט תיכף צופארן קיין מאנסי צום בית החיים הר שלום צו מיטהאלטן די לוויה פון די מאמע די רעבעצין ע"ה.
פרטי הלוויה אין שיכון סקווירא:
לויטן פלאן וועט די מיטה אנקומען קיין שיכון סקווירא ארום 4:00 נאכמיטאג, צוערשט וועט מען צוברענגען די מיטה צום הצלה גאראדזש אויף די רעיגען גאס, וואו כ"ק אדמו"ר מסקווירא שליט"א וועט אפווארטן די מיטה און זיך געזעגענען פון זיין לעצט פארבליבענע שוועסטער די חשובע רעבעצין ע"ה. דער רבי שליט"א וועט נישט ארויספארן קיין בארא פארק צו די לוויה ביי ביהמ"ד הגדול ראחמיסטריווקא.
פון דארט וועט די מיטה געפירט ווערן צום הויף פארנט פון ביהמ"ד הגדול אין שיכון סקווירא, וואו טויזענטער חסידים, די ילדי הת"ת און בחורי הישיבות, וועלן אנטייל נעמען אפצוגעבן דעם כבוד האחרון. נאך קל מלא רחמים וועט מען באגלייטן די מיטה ארויף די וואשינגטאן גאס ביז צום עק פון שטעטל, און פון דארט וועט די מיטה געפירט ווערן קיין מאנסי לקבורה.
בהוראת הקודש פון כ"ק אדמו"ר מסקווירא שליט"א, וועלן אלע תלמידי הישיבות פון די ישיבות קטנות דחסידי סקווירא אין מאנסי, וויליאמסבורג, בארא פארק, און מאנטיסעלא, אריינפארן קיין שיכון סקווירא צו מיטהאלטן די מסע הלוויה פון די חשובע רעבעצין ע"ה.
פרטי וסדר הלוויה אין מאנסי:
4:45 וועט פארקומען די מסע הלוויה פארנט פון ראחמיסטריווקא ביהמ"ד אויף האופעל לעין אין מאנסי.
די בלאוועלט גאס וועט זיין פארשלאסן פאר פארקער, פון האופעל לעין ביז וועסט מעיפל, נאך קל מלא רחמים וועט מען באגלייטן די מיטה ארויף בלאוועלט ביז וועסט מעיפל, דערנאך וועט מען זיך איינדרייען רעכטס אויף וועסט מעיפל, און באגלייטן ביז סעדל ריווער, מען וועט ווייטער באגלייטן אראפ סעדל ריווער, אדורך ביהמ"ד בארניב, בית מדרשו פונעם איידעם כ"ק אדמו"ר מבארניב שליט"א, און ביי גראוו סטריט וועט זיין צוגעשטעלט באסעס פארן גאנצן עולם, צו פארן צום בית החיים הר שלום אין עירמאונט.
די קינדער פון ת"ת וויזניץ אין מאנסי, וועלן אהיימגיין בעפאר די נאכמיטאג סדר פון לימודי חול, אפצוגעבן דעם כבוד האחרון פאר די חשובע רעבעצין ע"ה.
-------
מאנטאג בהעלותך 11:30 פארמיטאג
העפטיגע צוגרייטונגען דורך די ניו יארק סיטי פאליציי און מערערע אידישע הילף ארגענעזאציעס אין בארא פארק.
----
מאנטאג בהעלותך 9:20 אינדערפרי
די מסע הלוויה פון הרבנית הצדיקת מראחמיסטריווקא ע"ה איז באשטימט געווארן אויף היינט נאכמיטאג:
1:30 וועט די לוויה פארקומען פארנט פון ביהמ"ד הגדול ראחמיסטריווקא אין בארא פארק.
4:00 וועט די לוויה פארקומען פארנט פון ביהמ"ד הגדול אין שיכון סקווירא.
4:45 וועט די לוויה פארקומען פארנט פון ראחמיסטריווקא ביהמ"ד אויף האופעל לעין אין מאנסי.
און דערנאך וועט די מיטה געפירט ווערן צום בית החיים הר שלום אין מאנסי, וואו די רעבעצין ע"ה וועט קומען לקבורה סמוך ונראה צום ציון הק' פון איר גרויסן מאן כ"ק אדמו"ר הרה"ק מראחמיסטריווקא זצ"ל.
----
-
מאנטאג בהעלותך 9:10 אינדערפרי
שטייענדיג בלויז עטליכע מינוט נאך די פטירה פון הרבנית הצדיקת מראחמיסטריווקא ע"ה, זעהן זיך שוין אן די ערשטע צוגרייטונגען אויף די בארא פארקער גאסן, אין בעפארברייטונג צום גרויסן לוויה וואס וועט פארקומען אויף די פינף און פערציגסטע סטריט, פארנט פון ביתו נאוה קודש פון הרה"ק מראחמיסטריווקא זצ"ל, און פארנט פון די גרויסע ראחמיסטריווקא בית המדרש אין בארא פארק.
