ווי באריכטעט פארגאנגענע וואך האט זיך אפגעשפילט א געוואגטע רויבעריי אינעם בנין ביהמ"ד הגדול דחסידי טשערנאביל אויף רחוב חבקוק אין בני ברק, ווען עטליכע פארמאסקירטע פארברעכער האבן זיך איינגעבראכן אינמיטן נאכט אינעם פריוואטן צימער פונעם רבי'ן שליט"א, און גערויבט פון דארט טייערע ווערדפולע זילבערווארג מיט וואס דער רבי שליט"א באנוצט זיך ביי די טישן אין ביהמ"ד הגדול.
די גבאי הביהמ"ד האבן באלד נאכן באמערקן די רויבעריי אלארמירט די פאליציי, וואס האט געעפנט א אויספארשונג צו כאפן די פארברעכער און נאכגיין זייערע שפורן, נאך עטליכע טעג פון העפטיגע זוכערייען און נאכשפיאנירן אלע באווייז, האט די פאליציי באוויזן צו לייגן א האנט אויף די פארברעכער און זיי ארעסטירט, און די ווערדפולע זילבערווארג איז געפונען געווארן אין א באהאלטענע פלאץ.
