שטייענדיג צוויי חדשים נאך די פריצייטיגע און פלוצלינגדיגע פטירה פון הרב הגאון רבי צבי זאב בערגער זצ"ל מורה צדק אין קהילה קדושה צאנז קלויזענבורג אין בארא פארק, וועט בעז"ה פארקומען מארגן דינסטאג א גרויסע עצרת מספד והתעוררות לזכרו, אין ביהמ"ד הגדול צאנז קלויזענבורג אין בארא פארק.
דער דיין זצ"ל איז געווען באקאנט ביי טויזענטער אידן מיט זיין גדלות בתורה, זיינע קלארע פסקים און תשובות און זיינע רייכע שיעורים בכל מקצועות התורה. ליידער איז ער פריצייטיג פארשניטן געווארן אין בליענדן עלטער פון דריי און פערציג יאר זייענדיג אויף אפרוה אין שווייץ, מיט צוויי חדשים צוריק ביום כ"ח אב דינסטאג פרשת שופטים.
אצינד שטייענדיג נאך די ימי השלושים און נאך די ירח האיתנים, וועט בעז"ה פארקומען א גרויסע עצרת מספד והתעוררות אין ביהמ"ד הגדול צאנז קלויזענבורג, וואו מען וועט הערן פאסיגע דברי הערכה פון חשובע רבנים, צום הויכפונקט וועט כ"ק אדמו"ר מצאנז קלויזענבורג שליט"א משמיע זיין דברי הספד וזכרון, נאך וואס דער רבי שליט"א איז נישט געווען אנוועזנד ביי די לוויה, זייענדיג דאן צוגאסט אין ארץ ישראל אויף א מסע הקודש.
