א היסטארישער מעמד איז פארגעקומען אינערהאלב די ראמען פון דעם בארימטער "תורה-24 כולל נעץ״ וואו צענדליגער אינגעלייט האבן זיך פארהערט גאנץ חושן משפט.
"תורה-24" איז א הערליכע מקום תורה וואס איז געגרינדעט געווארן מיט עטליכע יאר צוריק דורך דעם בארימטער בונה ומקים עולמות של תורה פוזנא רב, הגאון ר' אברהם הלוי אייזען שליט"א, נאך וואס דער שר התורה הגאון רבי חיים קנייבסקי זצ"ל האט אויסגעדרוקט זיין רצון אז עס זאל זיין א מקום תורה וואו מען הערט נישט אויף צו לערנען 24 שעה א טאג, 7 טעג א וואך רונדע דעם זייגער.
דאן איז אוועקגעשטעלט געווארן דעם הערליכער בית מדרש פון "תורה-24" וואס געפונט זיך אויף א הייליגע לאקאציע אז פונעם פענסטער קען מען זען דעם מקום המקדש, און מען האט אויסגעשטעלט א ספעציעלער סיסטעם אז עס זאל נישט זיין קיין איין מינוט פון טאג, וואס עס איז נישט פארהאן קיין קול תורה אינעם בית מדרש.
עס זענען פארהאן אפטיילונגען פון אומגעפער 11 באזונדערע כוללים וואס יעדע פון זיי לערנען אין אנדערע שעות, אז ווען איין כולל פארענדיגט האט שוין דער אנדערער כולל אנגעהויבן, און אזוי ארום פארזיכערט מען אז דער קול תורה הילכט אפ אן אויפהער.
די לימודים אין די כוללים זענען געוואנדן אין יעדע כולל, און צווישן די 11 כוללים ווערט אדורכגעלערנט רוב מקצועות התורה ביגיעה רבה, צווישן די אפטיילונגען איז פארהאן א כולל חצות אונטער די אנפירערשאפט פונעם מקובל הרב אברהם אייזענבאך שליט"א, א כולל ערב שבת, און נאך פילע כוללים צושפרייט דורכן טאג און נאכט.
ספעציעל שיינט ארויס דער חבורת חושן משפט וואס שטייט אונטער די פירערשאפט פונעם ראש הכולל הרה"ג ר' אלימלך שווירץ שליט"א, וואס באשטייט פון א גאר געהויבענע חבורה פון בני עליה, דיינים, און ערנסטע אינגעלייט וועלכע הארעווען די קאמפליצירטע דיני ממונות סוגיות אויף א אופן פון ללמוד וללמד.
דורכאויס די לעצטע תקופה איז אינטערגענומען געווארן א ספעציעלע פראגראם גערופן "קנין חושן משפט - באר אברהם" וואס איז נתנדב געווארן דורך הרב ישראל הלוי מאשקאוויטש שליט"א פון לאנדאן לע"נ זיין טאטע הרב אברהם צבי בן הרב ישראל הלוי מאשקאוויטש זצ"ל, וואס דער פראגראם האט אוועקגעשטעלט א ספעציעלער סיסטעם פון בחינות וואס קומען פאר יעדע וואך, חודש, און יעדע דריי חדשים, אא"וו, כדאי צו פארזיכערן אז די חברי הכולל טוען כסדר איבער'חזר'ן די לימודים און מען פארהערט זיך עס נאכמאל און נאכאמאל.
אצינד האבן די חשוב'ע אינגעלייט זוכה געווען זיך צו שטעלן על קור המבחן אויף גאנץ חושן משפט וואס זיי זענען פארהערט געווארן סיי אין א בחינה בכתב, און דערנאך דורך הגאון רבי נפתלי נוסבוים שליט"א, וועלכע האט אויסגעדריקט זיין התפעלות פון די געוואלדיגע קלארע קענטעניסן פון די אברכי הכולל וועלכע האבן ארויסגעוויזן א זעלטענער בקיאות אין די לימודים.
דער מעמד איז געשלאסן געווארן מיט א הערליכע מסיבת סיום לכבודה של תורה, מיט די באטייליגונג פונעם נדבן הרב ישראל מאשקאוויטש שליט"א, וואו די אינגעלייט האבן באקומען דאזעס פון חיזוק צו קענען ווייטער ממשיך זיין מיט זייער זעלטענער יגיעת התורה פאר לאנגע יארן.
