צום אכטן טאג צו די היסטארישע שמחה וואס האט איינגענומען גאנץ כלל ישראל, מיט די געבורט פון א יונגעלע, דאס ערשטע קינד ביי הגאון הגדול הישיש רבי צבי קושלעווסקי שליט"א ראש ישיבת היכל התורה אין ירושלים, איז היינט זונטאג צופרי געפראוועט געווארן די פייערליכע שמחת הברית במעמד הונדערטער אידן, תלמידי ובוגרי הישיבה, און פילע גדולי הדור וואס זענען געקומען זיך באטייליגן ביים גרויסן שמחה.
די ימי השמחה האט זיך שוין אנגעהויבן פרייטאג צונאכטס ביים שמחת השלום זכר, וואס איז אנדערש ווי געפלאנט פארגעקומען אין די היכל הישיבה אין די הר נוף געגנט, און נישט ווי די ארגינעלע פלאן אין די חדר אוכל פון ישיבה, צוליב די ריזן ציבור המשתתפים. א געשאצטע דריי טויזענט אידן זענען אדורכגעגאנגען דעם בית המדרש פרייטאג צונאכטס מיטהאלטן די שמחה און זיך וואונטשן ביים גרויסן בעל שמחה, און מוצאי שבת איז פארגעקומען די קריאת שמע ליינען כנהוג בהתעוררות רב.
היינט צופרי נאך שחרית אין די היכל הישיבה איז פארגעקומען די שמחת הברית, דער אבי הבן הרה"ג ראש ישיבת היכל התורה שליט"א האט געדינט אלס סנדק, און פארגעזאגט די פסוקים מיט גרויס התעוררות. אזוי אויך האט מען פארן ברית געזאגט אינאיינעם פרקי דרחמי און פסוקי שבח והודאה. מיט ברכות וקריאת השם איז מכובד געווארן דער פוסק הדור הגאון האדיר ר' משה שטערנבוך שליט"א מרא דארעא קדישא, ויקרא שמו בישראל "אליהו" נאכן פאטער פונעם ראש ישיבה, הגאון ר' אליהו קושלעווסקי זצ"ל רב פון באר שבע.
דערנאך איז פארגעקומען די סעודת הברית מיט גרויס פרייליכקייט אין זאל שירת ירושלים, ביים שמחה האבן זיך אויך באטייליגט כ"ק אדמו"ר מסטראפקוב שליט"א, הגאון ר' עזריאל אויערבאך שליט"א, הגאון ר' יעקב הלל שליט"א ראש ישיבת אהבת שלום, און נאך גדולי הדור וראשי הישיבות.
